Ál-Farabı kítaphanasynda jańa Konstıtutsıya jobasy jáne referendum ınstıtutynyń mańyzy men máníne arnalǵan dóńgelek ústel óttí. Oǵan zańger-ǵalymdar, sayasattanushylar men sarapshylar, úkímettík emes ūıymdardyń jáne BAQ ókílderí qatysty.
QazŪU qalashyǵynda ótken jıyn «Jańa Konstıtutsıya jobasy boıynsha referendum: Qazaqstan Respublıkasy halqynyń sheshím qabyldaudaǵy demokratıyalyq nysany» dep ataldy. Dóńgelek ústel barysynda qatysushylar referendum ótkízudíń konstıtutsıyalyq-qūqyqtyq negízderín, onyń memlekettík basqaru júıesíndegí mańyzyn jan-jaqty talqylady.
Jıyn barysynda mūndaı strategıyalyq sheshímderdí qabyldauda azamattyq qoǵamnyń rólí de basty taqyryptyń bírí boldy. Zań ǵylymdarynyń doktory, professor Gúldana Quanalıeva jańa Konstıtutsıya boıynsha elímízde paıda bolǵaly otyrǵan «Halyq keńesí» syndy jańa ınstıtuttyń mán-mańyzyna toqtaldy. Ol mūndaı jańa qūrylym klassıkalyq bılík tarmaqtaryna jatpaǵanymen, memleket basqarudyń qazaqstandyq úlgísín aıqyndaıtyn, ózínshe qūqyqtyq tabıǵaty bar bılík pen qoǵam arasyndaǵy sením kepílíne aınaluy múmkín degen píkírín ortaǵa saldy.
Zań ǵylymdarynyń kandıdaty, professor Saltanat Atahanova jańa Konstıtutsıya jobasynda adam qūqyqtarynyń basty orynǵa qoıylǵanyn aıryqsha atady. Qoǵam nazaryndaǵy jańa Konstıtutsıya nūsqasy adam qūqyqtaryn eń basty negízge alǵanyn, būl zań ústemdígí, adam qūqyǵy ústemdík qūratyn Jańa Qazaqstannyń negízí ekenín basa aıtty. Árí «Jańa Konstıtutsıya ózegí – Adam» degen kontseptualdy kózqarasyn ortaǵa saldy.
Ǵylymı talqyǵa qatysqan sayasattanushylar men sarapshylar Qazaqstandaǵy konstıtutsıyalyq reformalardyń tarıhı tájírıbesí jáne konstıtutsıyalyq ózgerísterdí qabyldaudyń halyqaralyq praktıkasy jónínde píkír almasady.