2020 jyldan berí Qazaqstanda 1,1 mln oqushy ornyna arnalǵan 1 242 jańa mektep salyndy, – dep habarlaıdy aqshamnews.kz tílshísí.
Osy auqymdy jūmystyń nátıjesínde úsh auysymdy mektepter sany 4 esege, apatty ǵımarattar sany 2,5 esege, al oqushy ornynyń tapshylyǵy 4 esege qysqardy.
Mektep jelísín jańartudaǵy eń írí qadam Qazaqstan Respublıkasynyń Prezıdentí Qasym-Jomart Toqaevtyń bastamasymen íske qosylǵan «Keleshek mektepterí» ūlttyq jobasy boldy. Úsh jyl íshínde, 2023 jyldan 2025 jylǵa deıín, elde jalpy syıymdylyǵy 460 myńnan astam oqushyǵa arnalǵan 217 jańa formattaǵy mektep paıda boldy. Jańa ǵımarattar audany boıynsha būrynǵy tıptík jobalardan 15–20%-ǵa keń, al tehnıkalyq jabdyqtalu deńgeıí olardan tórt ese joǵary. Árbír mektepte eńbekke baulu sheberhanalary, muzyka jáne horeografıya zaldary, STEM-zerthanalar, robototehnıka kabınetterí, kovorkıng-aımaqtar jáne sport zaldary jūmys ísteıdí. Joba 43 úsh auysymdy jáne 8 apatty mekteptíń máselesín tolyqtaı sheshuge múmkíndík berdí. Barlyq kezeńderde sapany júıelí baqylaudy jobany úılestírushí Y. Altynsarın atyndaǵy Ūlttyq bílím akademıyasy qamtamasyz etedí.
Jańa ǵımarattar salumen qatar, qoldanystaǵy mektepterdí auqymdy renovatsıyalau júrgízílude. Memleket basshysynyń tapsyrmasymen 1 300 mekteptí bíryńǵaı zamanauı formatqa kóshíru baǵdarlamasy íske qosyldy. 2025 jyly osy baǵdarlama boıynsha 190 myń orynǵa arnalǵan 245 mektep jańartyldy. Jańartylǵan ǵımarattarda kítaphanalar, ashanalar men sport zaldary jóndelíp, qauípsízdík júıelerí retteldí.
Qosymsha qarjylandyru kózí retínde Prezıdenttíń tapsyrmasymen qūrylǵan Bílím beru ınfraqūrylymyn qoldau qory jūmys ísteıdí. Jemqorlardan tárkílengen qarajat esebínen 86 myń orynǵa arnalǵan 77 mekteptíń qūrylysy ayaqtaldy. Olardyń basym bólígí demografıyalyq júktemesí joǵary aımaqtarda ornalasqan: Almaty, Túrkístan, Qyzylorda, Jambyl oblystary men Astana qalasynda.
Memleket basshysy qoıǵan basym míndetterdíń bírí qalalyq jáne auyldyq mektepter arasyndaǵy bílím sapasy alshaqtyǵyn joyu bolyp tabylady. «Keleshek mektepterí» jobasy boıynsha salynǵan mektepterdíń árbír ekínshísí derlík auyldyq jerde ornalasqan, barlyǵy 84 nysan. Renovatsıya baǵdarlamasy qamtyǵan 1 300 ǵımarattyń 820-sy da auyldarda ornalasqan. Jyl saıyn 1 000 oqu ornynda pándík kabınetter jańartyla otyryp, jóndeu júrgízíledí. Sonymen qatar, Oqu-aǵartu mınıstrlígí shaǵyn jınaqty jáne auyldyq mekemelerdegí bílím sapasyn arttyru, kadrlyq qamtamasyz etu men qauípsízdík máselelerí boıynsha strategıyalyq sheshímder daıyndauda.