1 mamyr kúní Jambyl atyndaǵy Qazaq memlekettík akademıyalyq fılarmonıyasynyń Úlken zalynda V «Gúl Almaty – 2026» hor óneríníń festıvalí ótpek, – dep habarlaıdy aqshamnews.kz tílshísí.
Baǵdarlama men oǵan qatysatyndar turaly Óńírlík kommunıkatsıyalar qyzmetínde ótken baspasóz konferentsıyasynda aıtyldy.
Mádenıet jáne aqparat mınıstrlígíníń qoldauymen ūıymdastyrylǵan festıval hor ónerín damytyp, jas oryndaushylardy qoldaıtyn alań retínde qalyptasty. Bıylǵy mereıtoılyq besínshí mausymda ūıymdastyrushylar repertuardy keńeıtuge basymdyq beríptí.
B. Baıqadamov atyndaǵy memlekettík hor kapellasynyń dırıjerí Áset Ahmetov festıvaldíń jyl saıyn kóptegen hor ūjymynyń basyn qosyp, úlken audıtorıya jınaıtyn mańyzdy alańǵa aınalǵanyn atap óttí.
«Gúl Almaty» festıvalí bírneshe jyldan berí kóktemde qaladaǵy hor ūjymdarynyń basyn qosyp kele jatyr. Baǵdarlama klassıkalyq hor muzykasynan bastap osy zamanǵy kompozıtorlardyń da shyǵarmalaryn qamtyǵan. Ekí kún boıy zal tolyp, kórermender arasynda eresektermen qatar jastar da bolady», — deıdí ol.
Qūrmanǵazy atyndaǵy Qazaq ūlttyq konservatorıyasynyń hor jetekshísí Yan Rudkovskıı festıvaldíń kásíbı ortadaǵy mańyzyna toqtaldy.
«Gúl Almaty» bír sahnada balalar men kásíbı ūjymdardy bíríktíríp, ūrpaq arasyndaǵy shyǵarmashylyq baılanysty nyǵaıtyp, oryndaushylyq deńgeıdíń ósuíne yqpal etíp jatyr», — deıdí dırıjer Áset Ahmetov.
A. Jūbanov atyndaǵy daryndy balalarǵa arnalǵan respublıkalyq qazaq mamandandyrylǵan muzyka mektep-ınternatynyń hor dırıjerlau bólímíníń meńgerushísí Aınūr Ualıhanqyzynyń aıtuynsha, festıval jas oryndaushylarǵa sahnada tájírıbe jınap, elímízdíń jetekshí ūjymdarymen tájírıbe almasuǵa múmkíndík beredí.
Festıval jyl saıyn qatysushylar geografıyasyn keńeıtíp, hor oryndaushylyǵynyń jalpy deńgeıín arttyryp keledí.
Baǵdarlama qazaqstandyq kompozıtorlardyń shyǵarmasyn, Almatyǵa arnalǵan ánder men álemdík hor klassıkasyn ūsynady. Sahnada «Kókek», «Kóktem» sıyaqty balalar ūjymdary, A. Jūbanov atyndaǵy RSMMShI hory, sondaı-aq «ALAKOZ» kameralyq hory, «Knyajıchı» erler hory, Qūrmanǵazy atyndaǵy konservatorıyanyń úlken hory men basqa da kásíbı ūjymdar óner kórsetpek.
Ūıymdastyrushylardyń aıtuynsha, besínshí ret ótkízílíp otyrǵan festıval hor mektepteríníń tájírıbe almasyp, Qazaqstandaǵy balalar shyǵarmashylyǵyn damytuǵa eleulí úles qosyp keledí.