Onda «Damu» qorynyń fılıaldary bazasynda barlyq tolǵandyrǵan másele boıynsha keńes aluǵa bolady, dep habarlaıdy aqshamnews.kz tílshísí.
Premer-mınıstrdíń orynbasary – ūlttyq ekonomıka mınıstrí Serík Jūmanǵarınníń tóraǵalyǵymen Úkímette ótken keńeste bıznestí qoldau jáne súıemeldeu ortalyqtaryn qūru tūjyrymdamasy tanystyryldy. Pılottyq joba «Damu» qorynyń óńírlík fılıaldarynyń bazasynda júzege asyrylady.
«Damu» qorynyń basqarma tóraǵasy Farhat Sársekeev atap ótkendeı, búgínde kásípkerler memlekettík qoldaudyń túrlí qūraldaryna qol jetkíze alady. Sonymen bírge olar bızneste qıyndyqtar tuyndaǵan kezde kóbínese qaıda júgínu kerektígín bílmeıdí. Óıtkení būl máselení sheshu ártúrlí memlekettík organdar men ūıymdardyń qūzyretíne kíruí múmkín. Máselení anyqtaudan bastap, ony retteuge deıíngí bıznestí keshendí súıemeldeudíń bíryńǵaı tetígín ázírleu qajettílígí tuyndap otyr.
«Qoldau ortalyqtaryn qūru kezínde «Atameken» ŪKP problemalyq máseleler tízílímínen 2,4 myńnan astam ShOB ótíníshíne taldau jasaldy. Onyń 600-den astamy pılottyq jobany íske qosu josparlanǵan óńírlerden kelíp túsken. Bıznes ótíníshteríníń negízgí bólígí qarjylandyruǵa qol jetkízu, bereshektí qaıta qūrylymdau, memlekettík qoldau sharalaryn alu, salyq, ónímdí ótkízu, kásípkerlík qūzyretterdí damytu boıynsha konsultatsıyalar turaly. Sondaı-aq sūranystardyń edáuír bólígí AÓK sektoryna qatysty. BQSO dál osy baǵytta jūmys ísteıdí. Būl rette ortalyqtardyń tıímdílígíníń negízgí kórsetkíshí ótkízílgen konsultatsıyanyń sany emes, kásípkerlerdíń rettelgen máseleleríníń úlesí bolady», – dep atap óttí Farhat Sársekeev.
Kúrdelí jaǵdaıǵa tap bolǵan jáne máselesín sheshu úshín qaıda júgínu kerektígín bílmeıtín kásípker úshín erekshe yńǵaıly ortalyqtardyń jūmysy «bír tereze» qaǵıdaty boıynsha qūrylady. Onda «Damu» qorynyń fılıaldary bazasynda barlyq tolǵandyrǵan másele boıynsha keńes aluǵa bolady. Pılottyq joba ayasynda BQSO bes óńírde – Astana, Almaty, Shymkent, Soltústík Qazaqstan jáne Aqtóbe oblystarynda ūıymdastyrylady. Qyrkúıekten jeltoqsanǵa deıín sozylatyn pılottyń qorytyndysy boıynsha jańa tetíktíń tıímdílígín baǵalau júrgízílíp, jobany elímízdíń barlyq óńíríne taratu turaly sheshím qabyldanady.
Keńeste ortalyqtardy íske qosu jáne jūmys ísteu tetígín pysyqtau úshín múddelí memlekettík, qūqyq qorǵau organdary, qarjy retteushílerí men «Damu» qory ókílderí qatysatyn jūmys tobyn qūru turaly sheshím qabyldandy.
