Jańa mausymdy alǵash bolyp «Astana Balet» teatry bastaıdy, dep habarlaıdy aqshamnews.kz tílshísí.
«Astana Balet», «Astana Opera» jáne Abaı atyndaǵy Qazaq ūlttyq opera jáne balet teatrynda jaqynda jańa mausym bastalady. Bıyl kórermenge ūlttyq repertuardaǵy tuyndylar, gastrol ayasyndaǵy qoıylymdar jáne qazaq ádebıetíníń klassıkasy negízínde sahnalanǵan balet premerasy ūsynylady.
Jańa mausymdy alǵash bolyp «Astana Balet» teatry bastaıdy. 28 jáne 29 tamyzda teatr sahnasynda Koreı ūlttyq baletí Adolf Adannyń muzykasyna qoıylǵan «Korsar» spektaklí kórsetíledí. Qoıylymnyń horeografy – Son Chjonbın.
XIV mausym ashylǵannan keıín «Astana Balet» truppasy Qazaqstannyń mádenıetí men dástúrín tanytatyn horeografıyalyq mınıatyuralar baǵdarlamasymen Vetnam men Frantsıyada óner kórsetedí. Avstrıyadaǵy gastrol ayasynda ártíster Vena sahnasynda «Blind Forgiveness» jáne «Qos kílem» baletterín ūsynady.
Aldaǵy mausymda ekí aktílí jańa balet sahnalanyp, sımfonıyalyq kontsertter men túrlí shyǵarmashylyq jobalar ūıymdastyrylady.
«Astana Opera» XIV teatr mausymyn 4 jáne 5 qyrkúıekte Ahmet Jūbanov pen Latıf Hamıdıdíń Mūhtar Áuezov lıbrettosyna jazylǵan «Abaı» operasymen ashady.
Qoıylym kompozıtorlardyń tuǵanyna 120 jyl toluyna oraı sahnalanady. Spektakl dırıjerí – Qazaqstannyń eńbek síńírgen qaıratkerí, Qazaqstan Respublıkasy Memlekettík syılyǵynyń laureaty Alan Bóríbaev.
Mausym barysynda teatrda bírneshe premera ótedí. Olardyń qatarynda Kırıll Radevtíń horeografıyasyndaǵy «Charlı ı Iren», Sūltanbek Ǵūmar sahnalaǵan «Tomırıs» baletterí jáne rejısser Erenbak Toıkenovtíń balalarǵa arnalǵan «Arman» muzykalyq spektaklí bar. Sonymen qatar «Astana Opera» sahnasynda Memlekettík ūlt teatry Anton Chehovtíń «Vanya aǵaı» jáne Jan-Batıst Molerdíń «Tartyuf» spektaklderín qoyady.
Abaı atyndaǵy Qazaq ūlttyq opera jáne balet teatry 93-mausymyn 12 jáne 13 qyrkúıekte «Aqbala» ūlttyq baletíníń premerasymen ashady. Qoıylym Ábdíjámíl Nūrpeıísovtíń «Qan men ter» trılogıyasynyń jelísímen sahnalanyp, shyǵarma alǵash ret balet ónerí arqyly kórermenge jol tartady.