2026 jyldyń qańtar-mamyr aılarynda respublıka jūmys berushílerí Elektrondyq eńbek bırjasynda (Enbek.kz) 495,7 myń bos jūmys ornyn jarıyalady, – dep habarlaıdy aqshamnews.kz tílshísí.
Būl 2025 jyldyń sáıkes kezeńímen salystyrǵanda 11,2 myńǵa nemese 2,3%-ǵa artyq (484,5 myń). Eńbek resurstaryna tūraqty sūranys ekonomıkanyń barlyq negízgí salalarynda saqtaluda. Ásírese auyl sharuashylyǵy, ónerkásíp jáne qūrylys salalarynda ósím qarqyny joǵary boldy.
Aılar bólínísínde ótken jyldyń sáıkes kezeńímen salystyrǵanda eń joǵary ósím nauryz aıynda (+27,6%) jáne sáuírde (+7,4%) tírkeldí. Qańtar aıyndaǵy kórsetkísh te ótken jyldyń deńgeıínen 3,6%-ǵa joǵary boldy.
Salalar boıynsha eń kóp bos jūmys orny bílím beru baǵytynda jarıyalandy. Būl salada 120,3 myń vakansıya ornalastyrylyp, jalpy sūranystyń shamamen 24%-yn qūrady.
Sonymen qatar óndírístík jáne agroónerkásíptík sektorlarda kadrlarǵa degen sūranystyń aıtarlyqtaı artqany baıqalady. Būl naqty sektordaǵy ekonomıkalyq belsendílíktíń kúsheıgenín kórsetedí:
auyl, orman jáne balyq sharuashylyǵy salasynda 37,5 myń bos jūmys orny ūsynyldy, būl 2025 jyldyń sáıkes kezeńímen salystyrǵanda 61,8%-ǵa kóp;
tau-ken óndíru ónerkásíbínde kadrlarǵa sūranys 48%-ǵa ósíp, 8,4 myń vakansıyany qūrady;
óńdeu ónerkásíbínde ósím 31,1%-dy qūrap, 37,8 myń bos jūmys orny jarıyalandy;
qūrylys salasynda vakansıyalar sany 26,6%-ǵa artyp, 32,1 myńǵa jettí.
Sondaı-aq ózge qyzmet túrlerín kórsetu salasynda da oń ósím baıqaldy – mūnda 75 myń bos jūmys orny jarıyalanyp, ótken jyldyń sáıkes kezeńímen salystyrǵanda 35,9%-ǵa artty. Kásíbı, ǵylymı jáne tehnıkalyq qyzmet salasynda da sūranys 34,6%-ǵa ósíp, 10,9 myń vakansıyany qūrady.
Óńírler bólínísínde bes aı íshínde eń kóp bos jūmys orny Astana qalasynda (41 myń), Pavlodar oblysynda (34,8 myń) jáne Túrkístan oblysynda (33,9 myń) tírkeldí. Al ótken jylmen salystyrǵanda kadrlarǵa sūranystyń eń joǵary ósímí Atyrau oblysynda (+63,2%), Aqmola oblysynda (+43,7%) jáne Túrkístan oblysynda (+23,2%) baıqaldy.
Jalpy alǵanda, 2026 jyldyń qańtar-mamyr aılaryndaǵy jıyntyq kórsetkíshter elímízdíń eńbek naryǵynda tūraqty oń úrdís saqtalǵanyn kórsetedí. Ásírese ónerkásíp pen agrarlyq sektorlarda sūranystyń artuy otandyq óndírístíń sapaly damyp kele jatqanyn aıǵaqtaıdy. Qazírgí uaqytta eńbek naryǵynda jūmys ízdeushíler úshín barlyq óńírler men negízgí salalar boıynsha jūmyspen qamtudyń keń múmkíndíkterí ūsynylyp otyr.