Jasóspírímderdí esírtkí ortasyna tartu máselesíne erekshe nazar audaryluda, dep habarlaıdy aqshamnews.kz tílshísí.
Íshkí íster mınıstrlígí "Zań men tártíp" qaǵıdatyn íske asyru ayasynda esírtkí qylmysyna qarsy kúres jáne onyń aldyn alu baǵytyndaǵy jūmystardy jalǵastyruda. Bıylǵy jyldyń alǵashqy jetí aıynda elímízde 4,5 myń esírtkí qūqyq būzushylyǵy tírkeldí. Zańsyz esírtkí aınalymyna qarsy júrgízílgen jūmystardyń nátıjesínde 17 sıntetıkalyq esírtkí óndíretín jasyryn tsehtyń qyzmetí toqtatyldy.
Sonymen qatar 7 ūıymdasqan qylmystyq toptyń joly kesílíp, olarǵa qatysty 12 qylmystyq ís qozǵaldy. 9 ūıymdastyrushy men 41 qatysushy ūstaldy.
Esírtkí qylmysyna qarsy ís-qımyl barysynda zańsyz aınalymnan 865 kelí esírtkí zaty tárkílendí. Būl – mıllıondaǵan doza esírtkíníń zańsyz aınalymǵa túsuíne jol berílmegenín bíldíredí.
Jasóspírímderdí esírtkí ortasyna tartu máselesíne erekshe nazar audaryluda. Jyl basynan berí 55 kámeletke tolmaǵan ūstaldy. Olardyń 32-sí esírtkí ótkízumen baılanysty áreketterge qatysy bar.
Esírtkí qylmystarynyń aldyn alu baǵytynda profılaktıkalyq jūmys ta kúsheıtíldí. Uákílettí organdar 2 mıllıonnan astam jas pen jasóspírímdí qamtyǵan 14 myńnan astam ís-shara ótkízdí.
Aqparattyq keńístíktegí túsíndíru jūmystary da jalǵasuda. Būqaralyq aqparat qūraldary men áleumettík jelílerde esírtkíge qarsy taqyrypta 24 myńǵa juyq jarıyalanym jaryq kórdí.
Sonymen qatar esírtkí bıznesíníń qarjylyq negízín joyuǵa baǵyttalǵan sharalar qabyldanuda. 258 mln teńge kólemíndegí qarajatqa qatysty 10 myń bank kartasy men shot būǵattaldy. Būdan bólek, esírtkí saudasynyń kóleńkelí qarjy shemalaryna qatysy bar 215 myń sheteldík karta-shottyń tranzaktsıyalaryna shekteu qoıyldy.
Internet keńístígínde de zańsyz esírtkí aınalymyna qarsy jūmys júrgízílude. Nátıjesínde 8,5 myńǵa juyq esírtkí taratatyn saıt būǵattaldy.
Memlekettíń esírtkíge qarsy sayasaty qoǵamnyń qauípsízdígín qamtamasyz etuge, azamattardyń densaulyǵyn qorǵauǵa jáne esírtkíníń taraluyna jol bermeuge baǵyttalǵan. Būl baǵyttaǵy keshendí jūmystar aldaǵy uaqytta da jalǵasady.