Paıdalanushylar medıtsınalyq ūıymdar, kómekke júgínu tártíbí jáne zańnamada kózdelgen jauapkershílík sharalary turaly aqparat alady, dep habarlaıdy aqshamnews.kz tílshísí.
Pavlodar oblysynyń polıtsıya departamentí azamattarǵa esírtkíge qarsy aqparat pen konsultatsıyalyq kómektíń qoljetímdílígín arttyruǵa baǵyttalǵan jańa Antinarko.kz tsıfrlyq servısín tanystyrdy.
Jańa resurstyń tanystyrylymy óńírdíń basty sahnasy – Ertis Promenade alańynda óttí.
Antinarko.kz – konsultatsıyalyq qyzmetí jasandy ıntellekt tehnologıyalary arqyly júzege asyrylatyn Qazaqstandaǵy alǵashqy jobalardyń bírí.
- Jobany qūru ıdeyasy 11 jyldyq praktıkalyq jūmys tájírıbemnen jáne qıyn jaǵdaıǵa tap bolǵan adamǵa eń aldymen jyldam árí túsíníktí aqparat qajet ekenín túsínuden tuyndady. Adamǵa qaıda júgínu kerektígín, qaı jerden kómek aluǵa bolatynyn jáne zańnamada qandaı jauapkershílík qarastyrylǵanyn bílu mańyzdy. Sondyqtan kez kelgen uaqytta qoljetímdí árí qajettí aqparatty onlaın aluǵa múmkíndík beretín qūral jasaǵym keldí, – dedí Pavlodar oblysy polıtsıya departamentí esírtkí qylmysyna qarsy ís-qımyl basqarmasynyń asa mańyzdy íster jóníndegí aǵa jedel uákílí, polıtsıya podpolkovnıgí Irına Tımırgalıeva.
Antinarko.kz servısínde paıdalanushylar medıtsınalyq ūıymdar, kómekke júgínu tártíbí jáne zańnamada kózdelgen jauapkershílík sharalary turaly aqparat ala alady. Sonymen qatar paıdalanushylarǵa jasandy ıntellekt negízíndegí konsultatsıyalyq servıstí paıdalanu múmkíndígí ūsynylǵan.
Tsıfrlyq resurstyń íske qosyluy Pavlodar oblysy polıtsıya departamentíníń profılaktıkalyq jūmysty tsıfrlandyru baǵytyndaǵy bastamalarynyń bírí boldy.
Jańa servıs esírtkíge qatysty qūqyq būzushylyqtardyń aldyn aluǵa, halyqtyń qūqyqtyq sauattylyǵy men aqparattandyryluyn arttyruǵa, sondaı-aq konsultatsıyalyq kómektíń tsıfrlyq formattaǵy qoljetímdílígín keńeıtuge baǵyttalǵan júıelí jūmystyń bír bólígí bolyp tabylady.