«Plastık tapsyr da, jıhaz al» aktsıyasy eldí bírden eleń etkízdí, dep habarlaıdy aqshamnews.kz tílshísí.
Qala kúní men Dúnıejúzílík tazalyq kúníne (World Cleanup Day) oraı qalanyń basty ekologıyalyq alańy ashylyp, qaldyqty qaıta óńdeu men qorshaǵan ortaǵa jauapty boluǵa shaqyratyn alań tūrǵyndar men qonaqtardyń basyn qosty. Óńírlík kommunıkatsıyalar qyzmetí osylaı dedí.
«Plastık tapsyr — jıhaz al» aktsıyasy eldí bírden eleń etkízdí. Būl bastamany osyndaı formatta alǵash ret kópshílíkke ūsynǵan. Onda kelgenderge qaıta óńdelgen plastıkten óndírílgen jıhazdy tanystyrdy.
Aktsıyany ūıymdastyrushylardyń qatarynda ekolog, ECO Network jobasynyń negízín qalaushy, qalanyń Qoǵamdyq keńesíníń múshesí Evgenıı Mūhamedjanov pen jurnalıst, avtor jáne podkast júrgízushísí Tımur Balymbetov te bar. Tımur Balymbetov jūbaıymen, balalarymen bírge júr.
Evgenıı Mūhamedjanov ózíníń Facebook paraqshasynda:
«Bíz jūrtqa plastıktí qaıta óńdep, oǵan qaıtara ómír syılauǵa bolatynyn íspen kórsettík osy joly. Bárí ózderí būryn qoqysqa tastaıtyn plastıkten osyndaı sapaly jıhaz jasalǵanyn kóríp tańǵaldy», — dep jazdy ekolog.
Ekologıyalyq alańda plastık qaldyǵynyń qalaı qaıtadan kádege jaraıtyny qoljetímdí árí ınteraktıvtí formatta kórsetíldí. Qonaqtar plastıktí qaıta óńdeu protsesín kóríp, jaqynda ǵana qoqysqa tastalǵan nárseníń qalaı jańa paıdaly zatty óndíruge negíz bola alatynyn óz kózímen kórdí.
Ís-sharanyń mańyzdy bólígí otbasylar men balalarǵa arnaldy. Ekologıyalyq bastamalar tek ereje men shekteudíń jıyntyǵy retínde emes, bírge uaqytty qyzyqty árí paıdaly ótkízudíń múmkíndígí retínde ūsynyldy. Ūıymdastyrushylardyń píkírínshe, dál osyndaı praktıkalyq formattar arqyly ekologıyalyq mádenıet kúndelíktí ómírdíń bír bólígíne aınala alady.
Sonymen qatar bastama ayasyndaǵy ekologıyalyq alańdar ashu jaǵy Almatyda ǵana emes, Astana men Qaraǵandy qalasynda da qola alynypty.
«Būl bír rettík aktsıya emes. Bízdíń maqsatymyz — jergílíktí tūrǵyndardyń, ásírese jastar men balalardyń ekologıyalyq bílímí men daǵdysyn únemí jańartyp, jetíldíríp otyru», — dep tolyqtyrdy Evgenıı Mūhamedjanov.
Būǵan deıín Almaty balalary bír mıllıonnan astam plastık bótelke qaqpaǵyn jınaǵan bolatyn. Jobany júzege asyru barysynda olardan túrlí būıym jasaldy. «Erekshe» balalarmen bírge myńdaǵan shyrsha oıynshyǵy, 25 oryndyq, 30 shahmat jıyntyǵy, sondaı-aq myńdaǵan brelok, áshekeı, telefonǵa arnalǵan tūǵyr men basqa da paıdaly zattar ázírlendí.
Osy joly qaıta óńdelgen plastıkten kólemdí ekí «Taza Qazaqstan» stelasy jasaldy. Olardy daıyndauǵa 100 myń plastık qaqpaq paıdalanylǵan. Joba boıynsha ondaǵan eríktí stelany qūru úshín ekí aı boıy tynbaı eńbekteníptí.
Stelalar Satbayev University men Eko-Habtarmen bírlesíp jasaldy. Būl jaı ǵana art-nysandar emes, qaldyqtardyń ekínshí ómírge ıe bolyp, qalalyq ortanyń bír bólígíne aınala alatynyn kórsetetín kórnekí mysal.
Endí Almatyǵa áuejaı jaqtan kíríp kele jatqan nemese qaladan shyǵyp bara jatqan ár adam būl stelalardy kóre alady. Olar — qaıta óńdelgen plastıkten jasalǵan «Taza Qazaqstan» respublıkalyq baǵdarlamasynyń alǵashqy kózge túsetín sımvoldarynyń bírí.
«Almaty qalasynyń ákímdígíne sením bíldírgení úshín, Ekologıya jáne qorshaǵan orta basqarmasyna, ECO Almaty-ǵa, Satbayev University-ge, bízdíń Eko-Habtarǵa, eríktíler men, árıne, qaladaǵy bala bítkenníń barlyǵyna alǵysymdy bíldíremín. Dál solardyń arqasynda būl ıdeya osyndaı auqymdy jobaǵa aınalyp shyǵa keldí», — dedí Evgenıı Mūhamedjanov.