Su únemdeu tehnologıyalary suarmaly jerlerdíń 36%-yn qamtıdy, dep habarlaıdy aqshamnews.kz tílshísí.
Qazaqstan halqyna Joldauynda Memleket basshysy Qasym-Jomart Toqaev auyl sharuashylyǵyn tūraqty damytu úshín su resurstaryn únemdeu jáne zamanauı suaru tehnologıyalaryn keńínen engízu míndetterín aıqyndady. Úkímet su resurstaryna túsetín júktemeníń artuyna baılanysty agrarlyq sektorda sudy paıdalanu tásílderín kezeń-kezeńímen jetíldíríp, su ysyrabynyń aldyn aluǵa jáne suaru tıímdílígín arttyruǵa basymdyq beríp keledí. Sonymen bír mezgílde sharualardy qoldau sharalary kúsheıtílíp, ırrıgatsıyalyq ınfraqūrylymdar jańǵyrtylyp, jabdyqtardyń otandyq óndírísí damuda.
Su únemdeletín alqaptar kólemí úsh esege juyq óstí
Eger 2023 jyly zamanauı suaru júıelerí 237,1 myń gektar alqapta qoldanylsa, 2026 jylǵy 1 qyrkúıekte būl kórsetkísh 702,3 myń gektarǵa jettí. Būl – elímízdegí suarmaly jerdíń 36%-y. Tek 2026 jyldyń basynan berí su únemdeu tehnologıyalary qosymsha 158,8 myń gektarǵa engízíldí.
Tamshylatyp suaru alqaby shamamen alty esege artty
Tamshylatyp suaru alqabynyń kólemí 2023 jylǵy 42,5 myń gektardan bıyl 254,3 myń gektarǵa deıín óstí. Sol kezeńde jańbyrlatyp suaru alqaby 188,3 myńnan 379 myń gektarǵa deıín ekí esege artty.
2030 jylǵa qaraı jyl saıyn 2,2 mlrd tekshe metr sudy únemdeu josparlanuda
2030 jylǵa qaraı su únemdeu tehnologıyalaryn qoldanu aumaǵyn 1,3 mln gektarǵa deıín jetkízu josparlanyp otyr, būl jyl saıyn 2,2 mlrd tekshe metr sudy nemese suaru úshín paıdalanylatyn su kólemíníń 30%-na deıín únemdeuge múmkíndík beredí dep kútílude.
Sudy únemdeu tehnologıyalary suarmaly egínshílík damyǵan aımaqtarda qarqyndy engízílude
Bıyl zamanauı suaru júıelerímen qosymsha qamtylǵan 158,8 myń gektardyń shamamen 50 myń gektary Túrkístan oblysyna tıesílí bolyp otyr. Almaty oblysynda būl kórsetkísh 25,5 myń ga, Qyzylorda oblysynda 19,2 myń ga, Jetísu oblysynda 11,8 myń ga, Jambyl oblysynda 10,2 myń ga qūrady.
Su únemdeu tehnologıyalaryn memlekettík qoldau artyp keledí
Mūndaı júıelerdí satyp alu jáne ornatu shyǵyndaryn óteu úlesí 60%-dan 80%-ǵa deıín, al olardy paıdalanǵan kezde suaru suynyń qūnyn subsıdıyalau kólemí 50%-dan 85%-ǵa deıín ūlǵaıtyldy. 2026-2028 jyldary su únemdeu tehnologıyalaryn ınvestıtsıyalyq subsıdıyalauǵa 214,6 mlrd teńge qarastyrylǵan. Būl aldyńǵy úsh jyldyq kezeńmen salystyrǵanda shamamen tórt ese kóp.
Otandyq zauyttar sany tórtten jetíge deıín óstí
Ekí jylda osy segmenttegí otandyq kásíporyndardyń sany tórtten jetíge deıín óstí. Olardyń jıyntyq óndírístík quaty jylyna 3 390 jańbyrlatqysh mashınany qūraıdy. Būl shamamen 205 myń ga jerdí suaruǵa jetkílíktí. Elímízdíń jyl saıynǵy íshkí qajettílígí 1000-1200 mashına bolǵan jaǵdaıda, qazírgí óndírís kólemí sharualardyń sūranysyn jalpy alǵanda tolyq qamtamasyz etuge múmkíndík beredí.
Su únemdeıtín suaru júıelerín keńínen qoldanu su resurstaryn saqtauǵa, suaru kezíndegí shyǵyndardy azaıtuǵa múmkíndík beredí, sonymen bírge otandyq jabdyq óndírísíníń damuyn yntalandyrady.