14 nauryz kúní Almatyda Ūlystyń ūly kúní – Nauryz meıramynyń bastauy sanalatyn Kórísu kúní keń kólemde atap ótíldí, – dep habarlaıdy aqshamnews.kz tílshísí.
Merekelík ís-shara qalanyń kóríktí oryndarynyń bírí – Kóktóbede ótken «Kóktóbedegí Kórísu» atty kontserttík baǵdarlamamen bastalyp, qala tūrǵyndary men qonaqtaryna erekshe áser syılady.
Bıylǵy merekelík keshtíń basty erekshelígí – zamanauı tehnologıyalardyń keńínen qoldanyluy boldy. Ís-shara dybystyq drondardyń áserlí áue shouymen ashylyp, Kóktóbe aspany merekelík kóríníske bólendí. Joǵary tehnologıyaly drondar áuede qala tūrǵyndary men qonaqtaryn Nauryz meıramymen qūttyqtap, Kórísu kúníne tán erekshe merekelík atmosfera qalyptastyrdy. Būl áserlí kórínís jınalǵan kópshílíktíń ystyq yqylasyna bóleníp, kontserttíń sımvoldyq bastaluyna aınaldy.
Keshtíń eń erekshe árí kópshílíktíń qyzyǵushylyǵyn tudyrǵan sátterdíń bírí «Jasandy ıntellekt jyly» ayasynda robottardyń merekege qatysuy boldy. Zamanauı robottar halyq arasyna shyǵyp, kópshílíkpen kórísíp, qūshaqtasyp, merekelík kóńíl kúı syılady.
Merekelík baǵdarlama «Alatau» dástúrlí óner teatry artısterí daıyndaǵan teatrlandyrylǵan qoıylymmen jalǵasty. Qoıylymda qazaq halqynyń kóne dástúrí – kórísu salty sahnalandy. Artıster kórermendermen kórísíp, qūshaqtasu arqyly Kórísu kúníníń mání men mańyzyn aıshyqtaı tústí.
Keshte qazaqstandyq tanymal óner jūldyzdary óner kórsettí. Kontsertte Aıgúl Qosanova, Mádına Sáduaqasova, «Alatau serílerí», «KeshYOU», «Made in KZ», «Tūmar» toptary jáne «Saltanat» memlekettík bı ansamblí kórermenderge merekelík kóńíl kúı syılady.
Ís-sharaǵa 2000-nan astam adam qatysty. Būl kúní Kóktóbege kóteríletín aspaly jol kelushíler úshín tegín boldy. Sonymen qatar merekege kelgen tūrǵyndar men qonaqtarǵa tegín shaı ūsynyldy.
Drondar men robottardyń qatysqan «Kóktóbedegí Kórísu» merekesí almatylyqtar men qala qonaqtaryna kóteríńkí kóńíl kúı syılap, Nauryz meıramynyń bastaluyn aıshyqtaǵan mádenı oqıǵaǵa aınaldy. Būl bastama Almatyda Nauryz meıramyn jańa formatta atap ótudíń erekshe úlgísí retínde este qaldy.