Keıíngí jyldary Qazaqstan aumaǵynda būryn tírkelmegen qūstardyń 20-dan astam jańa túrí tabyldy. Būl kásíbı ornıtologtardyń ǵana emes, sonymen qatar derek jınauǵa belsene qatysatyn áuesqoı baqylaushylardyń da eńbegíníń arqasy. Būl turaly Almaty qalasynyń Óńírlík kommunıkatsıyalar qyzmetínde Halyqaralyq qūstar kúníne arnalǵan baspasóz konferentsıyasynda ornıtolog, Qazaqstan bıoaluantúrlílíktí saqtau qauymdastyǵynyń ǵylym jóníndegí dırektory Sergeı Sklyarenko málímdedí, – dep habarlaıdy aqshamnews.kz tílshísí.
«Halyqaralyq qūstar kúníníń maqsaty — olardy qorǵauǵa nazar audartu. Qazaqstanda qazír 520-dan astam qūs túrí bar. Jyl saıyn el aumaǵyna jańa túrlerí ūshyp kelíp jatyr. Olardy kóbíne óz betínshe baqylau júrgízíp, fotosuret arqyly dáleldeıtín áuesqoılar anyqtaıdy», — deıdí spıker.
Onyń aıtuynsha, áuesqoılardyń ǵylymǵa qosatyn úlesí artyp keledí. Qazaqstan úlken bolǵanymen, bízde kásíbı ornıtologtar az, sondyqtan entuzıastardyń bıoaluantúrlílík turaly bílímdí keńeıtuge kóp kómegí tıíp jatyr. Olardyń baqylauy men derekterdí tírkeuí qūstardyń kóshí-qony men taraluy turaly jańa ǵylymı málímettíń paıda boluyna sep bolady.
Sergeı Sklyarenko qūstardyń ekojúıedegí rólí erekshe ekenín atap óttí. Jándíkterdíń sanyn retteıdí, ózderí de basqa januarlarǵa jem bolady, sondaı-aq óleksemen qorekteníp, tabıǵatty tazartady. Qūstar ósímdíkterdíń tūqymyn taratyp, tozańdanuǵa qatysady. Adamǵa da azyq bolady olar.
«Qūstar auyl men orman sharuashylyǵynda zıyankestermen kúresuge kómektesedí. Degenmen olardyń áserí árdaıym bírjaqty emes: keıbír túrí egínge zıyan keltíruí múmkín. Mysaly, qaratorǵaılar men torǵaılardan júzímdíkter men kúrísh alqaptary kóp japa shegedí. Soǵan qaramastan, olar ekojúıe men adamǵa óte paıdaly», — dep túsíndírdí ol.
Sarapshy qūstar men adamnyń qaladaǵy ózara árekettesuíne de toqtaldy. Atap aıtqanda, kógershínder bír jaǵynan úırenshíktí árí jaǵymdy áser qaldyrsa, ekínshí jaǵynan lastanu kózí jáne qūs tūmauy men ornıtoz sıyaqty aurulardyń tasymaldaushysy boluy múmkín. Sonymen qatar qūstar ūshaq apatyna sebep boluy da yqtımal: Qazaqstanda olar jyl saıyn ūshaqpen soqtyǵysyp qalyp jatady, bíraq kóbí oqys oqıǵasyz ayaqtalady eken.
Ornıtofaunanyń qazírgí jaǵdaıyna toqtala kele, spıker jekelegen túrlerdíń azayuy — jahandyq úrdís ekenín aıtty. Qazaqstanda búgínde shamamen 60-qa juyq qūs túrí ártúrlí deńgeıde qauíp-qaterge ūshyraǵan.
«Qūstardyń tírshílígí árdaıym jaıly emes, basty qauíp — olardyń meken etu ortasynyń joıyluy. Būl ınfraqūrylymnyń damuy, paıdaly qazbalardy óndíru, landshafttyń ózgeruí men suly-batpaqty alqaptardyń qūrǵauymen baılanysty. Sonymen qatar qorshaǵan ortanyń lastanuy men mazalau faktory da áser etedí. Álemdík derekterge qaraǵanda, bar qūstyń sanynyń shamamen jartysy azaıǵan», — dedí Sklyarenko.
Sūlu tyrnanyń sany qystaıtyn elderdegí jaǵdaıǵa da baılanysty ózgeríp otyrady, būl halyqaralyq yntymaqtastyqtyń mańyzyn kórsetedí. Itelgíníń sany zańsyz aulau saldarynan aıtarlyqtaı qysqarǵan. Sondaı-aq elektr jelílerí de jyl saıyn myńdaǵan jyrtqysh qūstyń ólímíne sebepshí bolyp jatyr. Jel energetıkasynyń damuy da áserín tıgízude.
Erekshe alańdaushylyq tudyratyn máselelerdíń bírí — dıklofenak veterınarlyq preparaty. Ol būryn Úndístanda óleksemen qorektenetín qūstar sanynyń kúrt azayuyna ákelgen. Qazírgí uaqytta ol elde preparatqa tyıym salynǵannan keıín jaǵdaı bírtíndep jaqsara bastady, alaıda basqa elderde ony qoldanu jańa qauípter tudyruy múmkín.
Qalanyń ortalyq bólígínde torǵaılar men qarlyǵashtardyń sany aıtarlyqtaı azaıǵan, būl qalalyq ortanyń ózgeruímen baılanysty. Al su qūstary, kerísínshe, qalada qystap qaludy jıíletken. Mysaly, barqyldaq úırekter mūz qatpaıtyn su aıdyndarynda mekendep, adamdardan seskenudí qoıǵan. Sonymen qatar qalada olyapka men sırek kezdesetín kók qūs sıyaqty túrler jıírek baıqala bastady.
«Ár adam qūstardy saqtauǵa úles qosa alady. Ol úshín olarǵa jaǵdaı jasap, ósímdíktí kóptep egíp, japyraqty tolyq tazalamau kerek. Būl qorek bazasyn qalyptastyrady, óıtkení jándíkter japyraq arasynda qystaıdy. Sonymen qatar aumaqtardy shamadan tys hımıyalyq óńdeudí azaıtyp, qūstarǵa sudan tarshylyq kórmeıtíndeı etíp jaǵdaı jasau qajet», — dep atap óttí spıker.
Onyń aıtuynsha, qysta qūstardy, ásírese saryshymshyqtardy, qorektendíríp tūru kerek, jyly mezgílde aulalar men balkonda su íshetín ydystar men jasandy ūyalar ornatuǵa bolady. Būl bıoaluantúrlílíktí saqtap, qalalyq ortany adamdar men qūstar úshín jaıly etuge múmkíndík beredí.