Shymkentte kóz jūmǵan Nūraı Seríkbaıdyń aǵasy "kúdíktí jazadan qūtylyp ketuí múmkín" ekenín málímdedí. Onyń sózínshe, kísí ólímíne kúdíktí qazír Shymkent qalasyndaǵy ızolyatorda emes. Onyń aıtuynsha, kúdíktíge jasalǵan saraptamada "psıhıkalyq auytquy baıqalady" delíngen. Alaıda jábírlenushí tarap būǵan senbeıdí, – dep habarlaıdy aqshamnews.kz tílshísí "Jetínshí arnaǵa" sílteme jasap.
Nūraı Seríkbaıdyń aǵasy kúdíktíníń dení sau ekeníne senímdí. "Ol jalǵan anyqtama jasatyp, jazadan qūtylyp ketuí múmkín dep qorqamyz", - deıdí ol.
"Bírínshísí Shymkentte qaralǵan bolatyn, "psıhıkalyq auytquy baıqalǵan" dep anyqtama bergen. Bíz oǵan senbeı, Almatydan saraptama talap ettík, kúdíktí sol jaqqa bardy, ol jaqta da osyndaı anyqtama berdí. Būl jerde sımulyatsıyanyń belgílerí kóríníp tūr. Óıtkení kúdíktí - kádímgí ortada ómír súríp júrgen adam, sau adam. Estígením boıynsha qazír kúdíktí Shymkent qalasynda emes. Ol Talǵardaǵy psıhıkalyq emdeu ortalyǵynda", - dedí marqūmnyń aǵasy Sūltan Seríkbaı.
Jábírlenushí taraptyń advokaty Ayanhan Omarov ta tergeu sozylyp jatqanyn joqqa shyǵarmaıdy.