Ádílet mınıstrlígíníń málímetínshe, 2025 jyly alıment tólemeıtín boryshkerlerdíń basym kópshílígí – er adamdar. Mınıstrlík Aqshamnews.kz redaktsıyasyna alıment óndíru ísíníń kólemí, bereshek somasy jáne boryshkerlerge qoldanylatyn sharalar turaly tolyq derek ūsyndy.
Keıíngí 3 jyl íshínde alıment óndíru turaly qansha ís tírkelgen?
Qazaqstan Respublıkasy Ádílet mınıstrlígíníń Májbúrlep oryndatu komıtetí alımentterdí óndíru ísíne qatysty jańa derekterdí jarıyalady. Resmı aqparatqa sáıkes,
- 2023 jyly sot oryndaushylarynyń óndírísínde alıment óndíru turaly 326 myń ís bolǵan.
- Būl kórsetkísh 2024 jyly 343 myńǵa jetken.
- Al 2025 jyldyń basynan berí 317 905 atqarushylyq ís tírkeldí.
Alımentke baılanysty ísterdíń íshínde 13 myńnan asa nemese shamamen 4 paıyzy problemalyq dep tanylǵan. Būl íster boıynsha bereshek kólemí - 18,5 mlrd teńge.
Qansha ana alıment tóleuden jaltaryp júr?
2025 jylǵy 19 mausymdaǵy jaǵdaı boıynsha alıment tólemegen boryshkerlerdíń jalpy sany 247 795 adam.
- Onyń 240 420-sy (97 paıyzy) – er adamdar,
- al 7 375-í (3 paıyzy) – áıelder.
Komıtet alıment tólemeıtín erler men áıelderdíń araqatynasy boıynsha jeke statıstıka júrgízbeıtínín atap óttí.
Alımentten jaltarǵan qansha adam sottaldy?
2025 jyldyń alǵashqy alty aıda aumaqtyq ádílet organdary 2 615 boryshkerdí ákímshílík jauapkershílíkke tartqan. Sonymen qatar, Qazaqstan Respublıkasy Qylmystyq kodeksíníń 139-baby boıynsha íshkí íster organdaryna 528 ūsynys joldanǵan. Sonyń nátıjesínde bíryńǵaı tízílímde 429 ís tírkelíp, onyń 315-í sotqa joldandy, al 254 adam sottalǵan.
Boryshkerlerge qandaı jaza qoldanylady?
Zań boıynsha alıment boıynsha bereshegí úsh aıdan asqan boryshkerdíń banktegí qarajaty men múlkíne tyıym salynyp, shetelge shyǵuyna shekteu qoıyluy múmkín. Sondaı-aq, boryshkerdíń múlkín óndíríp alu sharalary qoldanylady. Atqarushylyq qūjatty oryndamau Qazaqstan Respublıkasynyń Ákímshílík qūqyq būzushylyq turaly kodeksíníń 669-babyna sáıkes ákímshílík jauapkershílíkke, al Qylmystyq kodekstíń 139-baby boıynsha qylmystyq jauapkershílíkke ákeledí.
Qylmystyq jauapkershílíkke tartylǵan adamǵa 600 saǵatqa deıín qoǵamdyq jūmystar, ekí jylǵa deıín bostandyǵyn shekteu nemese bas bostandyǵynan aıyru jazasy qoldanyluy múmkín.