Májílíste qaralyp jatqan arnaıy memlekettík organdar qyzmetíne qatysty zań jobasynda ekstremıstík jáne terrorıstík materıaldardy saqtauǵa tyıym salu normasy engízílmek, – dep habarlaıdy aqshamnews.kz tílshísí.
Deputat Bolat Kerímbek qoldanystaǵy zańnamada mūndaı materıaldardy ákeluge, shyǵaruǵa, daıyndauǵa jáne taratuǵa tyıym bar ekenín atap ótíp, endí olardy saqtauǵa da shekteu engízu ūsynylyp otyrǵanyn aıtty.
Talqylau barysynda Májílís deputaty Dmıtrıı Koloda būl normaǵa qatysty sūraq qoıdy. Onyń aıtuynsha, Ákímshílík qūqyqbūzushylyq turaly kodekste (ÁQBtK) mūndaı materıaldardy saqtaǵany úshín jauapkershílík būrynnan qarastyrylǵan. Osyǵan baılanysty ol arnaıy zańdarǵa būl normany engízudíń qajetín naqtylady.
ŪQK tóraǵasynyń orynbasary Almas Naımantaev būl túzetudíń naqtylaushy sıpatta ekenín túsíndírdí.
"Būl túzetu ekstremızm men terrorızmge qarsy ís-qımyl turaly salalyq zańdardy ÁQBtK normalarymen sáıkestendíruge baǵyttalǵan. ÁQBtK-de mūndaı materıaldardy saqtaǵany úshín jauapkershílík būrynnan bar. Alaıda salalyq zańdarda tek ákelu, daıyndau jáne taratuǵa ǵana tyıym kórsetílgen. Sondyqtan engízíletín ózgeríster jauapkershílíktí kúsheıtpeıdí, tek naqtylau sıpatynda bolady", – dedí Almas Naımantaev.
ÁQBtK-níń 453-babyna sáıkes, tyıym salynǵan materıaldardy saqtaǵany úshín:
• jeke tūlǵalarǵa – 20-dan 200 AEK-ke deıín (2026 jyly 86 500 – 865 000 teńge);
• lauazymdy tūlǵalarǵa – 25-ten 300 AEK-ke deıín (108 125 – 1,2 mln teńge);
• bıznes subektíleríne – 50-den 2000 AEK-ke deıín (216 250 – 8,6 mln teńge) aıyppūl qarastyrylǵan.
Jaza mólsherí qūqyqbūzushylyqtyń auyrlyǵyna baılanysty anyqtalady.