Densaýlyq saqtaý vıse-mınıstri balalar arasynda vırýs órship jatyr degen aqparatqa jaýap berdi, - dep habarlaıdy Aqshamnews.kz tilshisi.
Áleýmettik jelide balalar arasynda belgisiz vırýs tarap, ınfeksıalyq stasıonarlarda bos oryn qalmady degen aqparattar tarady. Densaýlyq saqtaý vıse-mınıstri Tımýr Muratov bul málimetti joqqa shyǵardy, biraq ınfeksıalyq bólimshelerdegi pasıentter sany rasymen artqanyn rastady.
Vıse-mınıstrdiń aıtýynsha, bul – kúz jáne kóktem mezgilderine tán maýsymdyq qubylys.
"Bul - ótpeli kezeń. Klımattyq jaǵdaıy uqsas elderdiń bárinde dál osy ýaqytta vırýstyq aýrýlardyń ósýi baıqalady. Degenmen, bıylǵy jedel respıratorlyq vırýstyq ınfeksıalar deńgeıi byltyrǵy maýsymnan joǵary emes", - dedi Muratov Úkimettegi baspasóz máslıhatynda.
Onyń sózinshe, bıyl tumaý jaǵdaılary da az tirkelip jatyr.
"Keıbir balalar ınfeksıalyq aýrýhanalarynda jáne eresekter stasıonarlarynda ýaqytsha júkteme artqan. Eger naýqastar bir mezette kóptep tússe, júıege túsetin salmaq ta ósedi. Iá, iri qalalarda pasıentter sany kóbeıgeni baıqalady, biraq bul - epıdemıalyq jaǵdaı emes. Búgingi tańda elde epıdemıologıalyq qaýip joq", - dep sendirdi vıse-mınıstr.