Qazaqstanda áıelder sany 10,4 mıllıonnan asty, - dep habarlaıdy Aqshamnews.kz tílshísí.
Qazaqstan halqynyń qūrylymynda áıelderdíń úlesí mańyzdy oryn alady. Olar eldíń áleumettík-ekonomıkalyq ómíríne belsendí qatysyp, bílím beru, densaulyq saqtau, sauda jáne kásípkerlík sıyaqty kóptegen salada negízgí qozǵaushy kúshterdíń bírí bolyp otyr. Ūlttyq statıstıka byurosynyń sońǵy derekterí áıelderdíń demografıyalyq qūrylymy men eńbek naryǵyndaǵy rólín aıqyn kórsetedí.
Ūlttyq statıstıka byurosynyń málímetíne sáıkes, 2026 jylǵy 1 qańtardaǵy jaǵdaı boıynsha Qazaqstan halqynyń jalpy sany 20 495 975 adamǵa jettí. Onyń íshínde 10 477 240 adam – áıelder, al 10 018 735 adam – er adamdar.
Nauryz aıyndaǵy málímetke saı, Qazaqstanda áıelder sany 10 488 074 adamdy qūraıdy. Olardyń ómírlík jas toptary boıynsha úlesí mynadaı: 0–15 jas – 29,1%, 16–60 jas – 55,5%, al 61 jastan joǵary – 15,4%. Áıelderdíń ortasha jasy – 34,1 jas. Al kútíletín ómír súru ūzaqtyǵy 79,4 jyldy qūraıdy.
Áıelder sany boıynsha kósh bastap tūrǵan aımaq - Almaty qalasy. Mūnda shamamen 1,2 mıllıon áıel tūrady. Odan keıín Túrkístan oblysy - 1 mıllıonǵa juyq áıel bar. Astana qalasynda 803,5 myń, al Almaty oblysynda 778,5 myń áıel tírkelgen.
Eńbek naryǵynda da áıelderdíń úlesí aıtarlyqtaı joǵary. Jūmyspen qamtylǵan halyq arasyndaǵy áıelderdíń úlesí 48 paıyzdy nemese shamamen 4,4 mıllıon adamdy qūraıdy. Jaldamaly jūmysshylar arasynda olardyń úlesí 50 paıyz bolsa, óz betínshe jūmyspen qamtylǵandar arasynda būl kórsetkísh 45 paıyzǵa teń.
Áıelderdíń jūmyspen qamtylu qūrylymyna nazar audarsaq, olardyń basym bólígí áleumettík mańyzy joǵary salalarda eńbek etedí. Atap aıtqanda, bílím beru salasynda jūmys ísteıtín áıelderdíń úlesí – 20 paıyz. Sauda salasynda – 19 paıyz, al densaulyq saqtau júıesínde – 10 paıyz.
Sonymen qatar kásípkerlík salasynda da áıelderdíń belsendílígí baıqalady. Jeke kásípkerler arasynda áıelderdíń úlesí 50,8 paıyzdy qūraıdy. Būl kórsetkísh áıelderdíń bıznes salasynda da belsendí túrde damyp kele jatqanyn kórsetedí.
Jūmys ísteıtín áıelderdíń jas erekshelígíne kelsek, olardyń eń kóp bólígí 35–44 jas aralyǵynda. Būl sanatta 1,3 mıllıon áıel eńbek etedí.
Jalpy alǵanda, atalǵan statıstıka áıelderdíń qoǵam men ekonomıkadaǵy rólí álí de mańyzdy ekenín kórsetedí. Olar bílím, densaulyq saqtau, sauda jáne kásípkerlík salalarynda belsendílík tanytyp, eldíń áleumettík-ekonomıkalyq damuyna aıtarlyqtaı úles qosyp keledí.
Aıta ketu kerek, Ūlttyq statıstıka byurosynyń deregínshe, ótken jyldyń osy kezeńínde Qazaqstandaǵy áıelder sany 10 381 377 adam bolǵan. Būl kórsetkíshpen salystyrǵanda áıelder sanynyń bírtíndep ósíp kele jatqanyn baıqauǵa bolady.