Aýyl sharýashylyǵy sanaǵy 1 tamyzdan bastap BUU Azyq-túlik jáne aýyl sharýashylyǵy uıymynyń (FAO) aýyl sharýashylyǵy sanaqtarynyń onynshy dúnıejúzilik baǵdarlamasy aıasynda ótkizildi.
Ol elimiz boıynsha shamamen 1,6 mln úı sharýashylyǵyn jáne 300 myń aýyl sharýashylyǵy qurylymyn qamtydy, - dep habarlaıdy Aqshamnews.kz.
Sanaq júrgizý boıynsha saýalnama paraǵyna jerdi paıdalaný, aýyl sharýashylyǵy tehnıkasy, egis alqaptarynyń kólemi, tyńaıtqysh qoldaný, mal sharýashylyǵy, eńbekpen qamtý jáne basqa da kórsetkishterge qatysty suraqtar engizildi. Aqparat iri agrarlyq kásiporyndardan, sharýa qojalyqtarynan, sondaı-aq aýyl sharýashylyǵymen aınalysatyn jeke qosalqy sharýashylyqtardan jınaldy. Derekter jınaý eki kezeńmen júrgizildi.
Birinshi kezeń onlaın formatta 1–31 tamyz aralyǵynda ótti. Saýalnama paraǵyn sanaq.gov.kz saıtynda ESQ, SMS-kod nemese eGovMobile qosymshasy arqyly QR-qoljetimdilik kómegimen toltyrýǵa múmkindik berildi. Bul múmkindikti shamamen 600 myń adam paıdalandy.
Ekinshi kezeń oflaın túrde 20 qyrkúıekten 20 qazanǵa deıin júrgizildi. El boıynsha 3 200-den astam ıntervúer saýalnama júrgizdi.
Jınalǵan málimetter memleketke agroónerkásiptik keshendi damytý, aýyldaǵy ómir sapasyn jaqsartý jáne resýrstardy utymdy paıdalaný baǵytynda neǵurlym naqty sheshimder qabyldaýǵa jol ashady.
Sanaq nátıjelerin aldyn ala óńdeý men taldaý aldaǵy aılarda aıaqtalady. Qorytyndy derekter arnaıy analıtıkalyq quraldar arqyly óńdelip, kórneki taldaý jasalyp, kelesi jyly Ulttyq statısıka búrosynyń saıtynda jarıalanatyn bolady.