Ógem ózeniniń boıynan joǵalǵan týrıserdiń zattary tabyldy.
Qazaqstan qutqarýshylary 15 táýlik boıy izdestirý jumystaryn jalǵastyryp jatyr. Olar Ógem ózeniniń boıynan áli tabylmaǵan týrıserdiń zattaryn taýyp, polısıaǵa tabystaǵan, dep habarlaıdy Almaty-akshamy.kz.
«Búgin saǵat 13:10-da Túrkistan oblysy Tóle bı aýdanynyń Aıǵyrjyqqan jáne Ógem ózenderiniń qosylǵan tusynan 500 metr qashyqtyqta joǵalǵan týrıserdiń zattary (jempir, aıaq qıim, uıyqtaýǵa arnalǵan qap) tabyldy. TJM qutqarýshylary olardy polısıa qyzmetkerlerine tabystady. Týrıserdiń biriniń anasy tabylǵan zattardyń arasynan óz balasynyń kıimin tanydy», – dep habarlady QR TJM resmı ókili Talǵat Ýálı.
Qazirgi ýaqytta joǵalǵan eki týrısi izdeý jumystary jalǵastyrylýda. Aımaqta «Qazavıaqutqarý» AQ tikushaǵymen aerovızýaldy barlaý jumystary júrgizilýde.
İzdestirý jumystary 15 táýlik boıy jalǵasýda. Oǵan Túrkistan oblysy TJ, polısıa departamentterinen, UQK Shekara qyzmetinen, Orman sharýashylyǵynan, Ózbekstan Respýblıkasy TJM jeke quramynan 137 qyzmetker, 17 birlik tehnıka, 1 tikushaq jáne joǵalǵan týrıserdiń týystary jumyldyryldy. İzdeý jumystary toǵyz baǵytta júrgizilýde.
Esterińizge sala keteıik, buǵan deıin joǵalǵan úsh týrıs qutqarylyp, ekeýiniń denesi tabylǵan bolatyn.
Túrkistan oblysynda joǵalǵan jeti týrıs týraly alǵashqy aqparat 25 mamyrda jarıalanǵan bolatyn. 29 mamyrda úsh týrıs aman-esen tabylyp, taǵy ekeýiniń máıiti tabylǵan. Qazirgi kezde qutqarýshylar qalǵan eki týrısi izdestirip jatyr.
