Memleket basshysy Armenıya premer-mınıstrín "Altyn Qyran" ordenímen marapattady, - dep habarlaıdy aqshamnews.kz tílshísí.
Qasym-Jomart Toqaev saltanatty ís-sharada qazaqstandyqtar Nıkol Pashınyandy Armenıyanyń damuyna jańa lep ákelgen, memlekettík qūrylymnyń barlyq salada qaıta jańǵyruyna tyń serpín bergen jalpyūlttyq kóshbasshy dep bíletínín jetkízdí.
– Sízdíń kóregen basshylyǵyńyzdyń arqasynda Armenıya ornyqty damu jolyna túsíp, halyqaralyq arenadaǵy pozıtsıyasyn nyǵaıtty. Sondaı-aq íshkí jáne syrtqy sayasatta parasatty, jauapty ūstanymymen úlgí kórsetíp otyr. Síz óte kúrdelí geosayası ahualda qalyptan tys árí batyl sheshím qabyldadyńyz. Túptíń túbínde būl armyan halqyna paıdasyn tıgízetín óte qūndy sheshím boldy. Dostas, bauyrlas Armenıya beıbítshílík, ornyqty damu jolyn tańdaǵany anyq. Būl íste Sízdíń tarıhı eńbegíńíz zor. Vashıngtonda qabyldanǵan Armenıya men Ázerbaıjan arasyndaǵy beıbít kelísímdí ílgeríletude eleulí ról atqarǵanyńyzdy atap ótkím keledí, – dedí Qazaqstan Prezıdentí.
Qasym-Jomart Toqaev búgínde qazaq-armyan memleketaralyq baılanysy strategıyalyq seríktestíktíń jańa deńgeıíne kóterílgenín málímdedí.
– Būl íske Sízdíń elderímíz arasyndaǵy san qyrly yntymaqtastyqty damytuǵa belsendí atsalysuyńyz aıtarlyqtaı yqpal ettí. Qazaq-armyan qarym-qatynasyn damytudaǵy úlken úlesíńíz ben aıryqsha eńbegíńízdí eskere otyryp, búgín Sízdí Qazaqstan Respublıkasynyń eń joǵary memlekettík nagradasy – "Altyn Qyran" ordenímen marapattau turaly sheshím qabyldadym. Būl – myzǵymas bauyrlastyǵymyzdyń, ózara berík senímníń jáne halyqtarymyzdyń keleshegí jolyndaǵy ortaq ūmtylystarymyzdyń jarqyn sımvoly, – dedí Prezıdent.