Mūndaı sheshím onlaın formatta ótken Eurazıyalyq ekonomıkalyq komıssıya (EEK) Keńesíníń kezektí otyrysynda qabyldandy. Komıssıyanyń Qazaqstan tarapyn Premer-mınıstrdíń orynbasary – ūlttyq ekonomıka mınıstrí Serík Jūmanǵarın basqardy.
Atap aıtqanda, Máskeu oblysynda AKRUS lak-boyau ónímderín óndíretín kásíporyn salu jóníndegí kooperatsıyalyq joba sóz boldy. Mūnda qoldanystaǵy analogtarmen salystyrǵanda korrozıya men ot áserínen qorǵau sıpattamalary joǵary lak-boyau materıaldaryn shyǵaru josparlanuda. Jobany júzege asyru bes jylǵa eseptelgen jáne onyń jūmysy bıyl bastalady.
Jobaǵa Belarustíń «Orıon-VK» ǵylymı-óndírístík kásíporny, materıaldar men tehnologıyalyq jabdyqtardyń bír bólígín jetkízudí qamtamasyz etetín qazaqstandyq «ASYL CONSTRUCTION» JShS jáne reseılík «AKZ pokrytıya» JShQ qatysady.
Taǵy bír jańa kooperatsıyalyq joba Samara gıps kombınaty bazasynda jańa aralastyru jelísín saludy kózdeıdí. Joba barysynda qūrylys jáne arnaıy maqsattaǵy qūrǵaq qospalar óndírísín jylyna 75,5 myń tonnaǵa ūlǵaıtu qarastyrylǵan. Qazaqstan tarapynan jobaǵa ınjenerlík jáne qūrylys qyzmetterín kórsetetín «Elıta» JShS, al Belarus tarapynan «Remeza» JAQ qatysady. Osy jobany íske asyrudan túsetín salyq túsímderí esebínen Qazaqstan byudjetí úshín boljamdy ekonomıkalyq tıímdílík shamamen 180 mln teńgení qūramaq.
Esteríńízge sala keteıík, 2025 jyly Aqmola oblysynda auyl sharuashylyǵy tehnıkasyn óndíru boıynsha kooperatsıyalyq joba maqūldandy.
EAEO-daǵy kooperatsıyalyq jobalar jobany íske asyruǵa beríletín qaryzdar boıynsha paıyzdyq mólsherlemení subsıdıyalau esebínen tómendetílgen mólsherlememen jeńíldetílgen qarjylandyru alady. Būl jobalar tehnologıyalyq damuǵa jáne óndírístíń jańa modelderín qalyptastyruǵa, sondaı-aq ekonomıkalyq odaqqa múshe elder arasyndaǵy sauda-ekonomıkalyq baılanystardy keńeıtuge yqpal etuge baǵyttalǵan. Keńes otyrysynda agrarlyq salaǵa qatysty bírqatar qūjattarǵa da túzetuler qabyldandy. Atap aıtqanda, auyl sharuashylyǵy daqyldarynyń sorttyq egístíkterín dalalyq aprobatsıyalau ádísíne ózgeríster engízu turaly sóz boldy. Būdan bólek, EAEO elderíníń kedendík shekarasy men aumaǵynda karantınge jatqyzylatyn ónímder men obektílerge qoıylatyn Bíryńǵaı karantındík fıtosanıtarıyalyq talaptarǵa ózgeríster engízu turaly sheshím qabyldandy. Olar qyzanaq, būrysh jáne baklajan beıím keletín pepıno mozaıkasy vırusyna qatysty karantındík fıtosanıtarıyalyq sharalardy qoldanudy ońtaılandyruǵa baǵyttalǵan.
Eldegí karantındík fıtosanıtarıyalyq qauípsízdíktíń jetkílíktí deńgeıín qamtamasyz etu shartymen atalǵan ónímderde osy vırustyń bolmauy turaly talapty alyp tastau kózdelíp otyr. Sondaı-aq EAEO elderíníń kedendík shekarasy men aumaǵynda karantındík fıtosanıtarıyalyq baqylauǵa jatatyn karantınge qoıylatyn ónímder tízbesíne ózgeríster engízu turaly sheshím qabyldandy. Atap aıtqanda, Bíryńǵaı talaptarda kózdelgen tańbasy bolǵan jaǵdaıda, aǵashtan jasalǵan qaptama jáne bekítu materıaldaryna fıtosanıtarıyalyq sertıfıkatty míndettí túrde resímdeu talaby joıylady.
Būl ózgeríster EAEO elderíníń aumaǵynda tıístí ónímderdí óndíru jáne saudalau úshín neǵūrlym qolaıly jaǵdaılar jasauǵa baǵyttalǵan. Keńes otyrysynda Keden odaǵynyń «Oıynshyqtardyń qauípsízdígí turaly» tehnıkalyq reglamentíne de ózgeríster qabyldandy. Túzetuler 14 jasqa deıíngí balalarǵa arnalǵan oıynshyqtarǵa qoıylatyn míndettí talaptardy belgíleıdí jáne tūtynushylardy óním turaly dáıeksíz aqparattan qorǵauǵa, sondaı-aq belgílengen qauípsízdík normalaryna sáıkes kelmeıtín oıynshyqtardyń aınalymǵa shyǵaryluyna jol bermeudí qarastyrady.
Taraptar sondaı-aq basqa da salalar men Komıssıyanyń qyzmetíne qatysty bírqatar ózge de rásímdík máselelerdí talqylap, olar boıynsha sheshímder qabyldady.
