Auqymdy arnaıy operatsıya bírneshe memlekettíń aumaǵyn qamtydy, dep habarlaıdy aqshamnews.kz tílshísí.
Operatsıya Ukraına jáne Albanıyanyń qūqyq qorǵau organdarymen, Qazaqstan men Ukraınanyń bas prokuraturalarymen, Interpol jáne AQSh-tyń Esírtkíge qarsy kúres basqarmasymen bírlesíp júrgízíldí.
Qylmyskerler zańdy jūmysqa ornalastyrudy jeleu etíp, call-ortalyq operatorlaryn, HR-menedjerlerdí, hımıkterdí, kurerlerdí, esírtkí jasyrushylardy, logıster men qoıma qyzmetkerlerín tartqan. Adamdarǵa ońaı tabys tabudy uáde etíp, ís júzínde olardy halyqaralyq esírtkí bıznesíne aralastyrǵan.
– Qylmystyq qūrylymda rólder naqty bólíngen. Ony kórshíles memlekettíń 36 jastaǵy azamaty ūıymdastyrǵan. Qazaqstannyń Íshkí íster mınıstrlígí operatsıyanyń barlyq negízgí kezeńderíne qatysty, - dedí QR ÍÍM esírtkí qylmysyna qarsy ís-qımyl komıtetí tóraǵasynyń orynbasary Quandyq Áljanov.
Qylmystyq árekettí qūjattau barysynda Ukraınada adamdardy zańsyz áreketke tartumen aınalysqan call-ortalyqtarda 26 tíntu júrgízílíp, tórt myńǵa juyq tsıfrlyq aıǵaqtar tárkílendí. Olardy taldau nátıjesínde Telegram jelísíndegí 31 esírtkí dúkení, qylmystyq shemany ūıymdastyrushylar jáne onda tartylǵan júzdegen adam anyqtaldy. Olardyń Qazaqstan aumaǵynda esírtkí taratuǵa qatysy bar-joǵyn ÍÍM qyzmetkerlerí tekserdí.
Mamyr aıynda operatsıyanyń kezektí belsendí kezeńí óttí. Qazaqstan ÍÍM ókílderíníń qatysuymen Kıev qalasy men Kıev oblysynda 70 tíntu júrgízílíp, adamdardy qylmysqa tartumen aınalysqan call-ortalyqtardyń qyzmetí toqtatyldy jáne qylmystyq qoǵamdastyqtyń 27 belsendí múshesí anyqtaldy.
Shílde aıynda Qazaqstan aumaǵynda ukraınalyq qūqyq qorǵau organdary ókílderíníń qatysuymen taǵy 15 tíntu júrgízíldí. Elímízde esírtkí satuǵa qatysy bar jelí múshelerí ūstaldy.
– Qylmystyq qūrylym íshínde qatań erejeler bolǵan. Qylmystyq áreketten bas tartuǵa tyrysqan adamdarǵa aıyppūl salynǵan, olardy ūryp-soǵyp, zańsyz ūstap otyrǵan. Tartymdy kórínetín bos jūmys oryndarynyń artynda adamdy esírtkí bıznesíne tartu tūrǵan. Al adam būl íske kírgennen keıín odan shyǵuǵa múmkíndík bermegen, - dedí QR ÍÍM esírtkí qylmysyna qarsy ís-qımyl komıtetí tóraǵasynyń orynbasary Quandyq Áljanov.
Operatsıyanyń qorytyndy kezeńínde Ukraınanyń bes oblysy men Kıev qalasynda taǵy 35 tíntu júrgízíldí. Azamattardy qylmysqa tartumen aınalysqan halyqaralyq jelíníń ekí buyny joıyldy.
Qūramynda sıntetıkalyq esírtkí bar 24 kelí qospa, 3,5 myńnan astam qoldan jasalǵan shylym jáne ólshep salynǵan ekí myńǵa juyq paket tárkílendí. Jetí adam ūstalyp, qylmystyq shemaǵa qatysqan toǵyz adamǵa aıyp taǵyldy.
– Būl sandardyń artynda taralmaǵan myńdaǵan esírtkí dozasy tūr. Būl adamdardyń densaulyǵyn saqtap qalu, otbasylardy esírtkíge táueldílíkten qorǵau jáne azamattardy qylmystyq bızneske tartyludan aman alyp qalu degen sóz. Halyqaralyq jelíní ūıymdastyrushylar men onyń barlyq qatysushylaryn anyqtau boıynsha jūmys jalǵasuda, - dedí spıker.
ÍÍM azamattardy ınternettegí ońaı tabys turaly ūsynystarǵa senbeuge shaqyrady. Tartymdy ūsynystardyń artynda halyqaralyq esírtkí jelísí tūruy múmkín.