Qazaqstannyń kandıdatýrasyna 180 memleket qoldaý bildirgen.
7 maýsym kúni ótken BUU Bas Assambleıasynyń 73-shi plenarlyq otyrysynda Qazaqstan BUU Ekonomıkalyq jáne áleýmettik keńesiniń (EKOSOK) quramyna 2022-2024 jyldarǵa saılandy, dep habarlaıdy Almaty-akshamy.kz QR Syrtqy ister mınıstrligine silteme jasap.
Keńes BUU-nyń ekonomıkalyq, áleýmettik jáne ekologıalyq qyzmetin úılestirýge jaýapty negizgi organ jáne osy salalardaǵy ózekti problemalar boıynsha sheshimderdi ilgeriletýge arnalǵan ortalyq alań bolyp tabylady.
«Qazaqstan EKOSOK-ta jahandyq Ornyqty damý salasyndaǵy maqsattardy tıimdi iske asyrý jáne Ortalyq Azıadaǵy neǵurlym mańyzdy gýmanıtarlyq problemalardy sheshý úshin halyqaralyq qarjy jáne saýda uıymdarymen yntymaqtastyqty nyǵaıtýǵa járdemdesýge nıetti.
Keńeske múshelik Qazaqstanǵa ekonomıka, áleýmettik sala jáne memlekettik basqarý reformalaryn júzege asyrý maqsatynda tabysty álemdik tájirıbeni tartýǵa da yqpal etetin bolady», - delingen QR SİM habarlamasynda.
Málim etilgendeı, daýys berý qorytyndysy boıynsha BUU EKOSOK músheligine AQSH, Aýǵanstan, Belız, Belgıa, Italıa, Kanada, Kot-d'Ivýar, Mavrıkıı, Oman, Perý, Tanzanıa, Týnıs, Úndistan, Horvatıa, Chehıa, Chılı jáne Esvatını ótti.
«Qazaqstannyń kandıdatýrasyn 180 memleket qoldady. Buǵan deıin Qazaqstan BUU EKOSOK quramyna 2007–2009 jáne 2014–2016 jyldar kezeńine eki ret saılandy», - dep naqtylady syrtqy saıasat vedomstvosynan.