Qazaqstan aýmaǵynda da urystar bolǵanyn kópshilik bile bermeıdi. Eń alǵashqy urystar eldiń batys óńirinde bolǵan.
Qazirgi Batys Qazaqstan oblysy, Bókeı ordasy aýdanynyń turǵyndary soǵystyń zardabyn tartty (ol kezde — Oral oblysy), dep habarlaıdy aqshamnews.kz Mádenıet jáne aqparat mınıstrligine silteme jasap.
Gıtler áskeri 1942 jyldyń 1 qyrkúıeginde Oral qalasyn basyp alýdy josparlaǵan. Osy sátten bastap Qazaqstan aýmaǵyn jaýlap alý bastalýy tıis edi.
Jánibek, Saıqyn jáne Shonǵaı stansıalaryn jaý avıasıasy bombalady. Bul eldimekenderden nebári 80 shaqyrym qashyqtyqta Stalıngrad úshin qıan-keski shaıqastar júrip jatqan edi. Astrahan – Saratov temir jolymen Stalıngrad shaıqasyna qarý-jaraq, janarmaı, dári-dármek jáne áskerı jabdyq tıelgen kólikter tasymaldandy. Sonymen qatar, osy shekara mańyndaǵy aýyldar Qazaqstannyń munaı men gazǵa baı batys aımaǵyna (Gýrev oblysynyń munaı ken oryndaryna) baratyn tranzıttik núkte boldy.
Fashıserdiń bul óńirge kóz tigýiniń taǵy bir sebebi – Batys Qazaqstannyń ońtústik aýdandary arqyly Stalıngrad maıdany men Joǵarǵy Bas qolbasshy stavkasy arasynda baılanys jelisi ornatylǵan. Nemister osy jelini joıý úshin bar kúshin saldy.
Keıbir derekterge qaraǵanda, Batys Qazaqstan aýmaǵyna 700-den astam bomba tastalǵan. Bombalaýdan qaza tapqan beıbit turǵyndardyń sany shamamen 300 adamǵa jetken. Temirjol boıynda keminde 50 baýyrlastar zıraty bar.