Maınıng kompanıyalary energıya júıesín teńestíruge de qatysady, dep habarlaıdy aqshamnews.kz tílshísí.
Qazaqstan alǵashqylardyń bírí bolyp salany damytu jáne elektr energıyasyn tūtynudy qadaǵalau úshín jaǵdaı jasaı otyryp, tsıfrlyq maınıngtí retteudí túsíníktí jáne ashyq etíp qūrdy. Būl rette maınıngtí odan árí damytu energıyamen jabdyqtau tetíkterín jetíldírudí jáne ınvestorlar úshín anaǵūrlym tartymdy jaǵdaılar jasaudy talap etedí. Būl turaly Úkímet otyrysynda Blokcheın jáne tsıfrlyq maınıng qauymdastyǵynyń prezıdentí Danıyar Múbarakov málímdedí.
Ol halyqaralyq tájírıbe kórsetetíndeı, energetıkalyq jáne esepteu ınfraqūrylymyn damytuda tsıfrlyq maınıngtíń mańyzdylyǵy zor ekenín atap óttí. AQSh-ta būl sala jyl saıyn ekonomıkaǵa $4,1 mlrd-tan astam tabys ákeledí jáne 31 myńnan astam jūmys ornyn qūrady. Maınıng kompanıyalary, sondaı-aq energıya júıesín teńestíruge de qatysady, energetıka ınfraqūrylymyna ınvestıtsıya tartyp, derekter ortalyqtaryn damytady, būl bolashaqta jasandy ıntellekt úshín paıdalanylatyn bolady.
Danıyar Múbarakovtyń aıtuynsha, Qazaqstan salany damytu úshín bírqatar básekelestík artyqshylyqtarǵa ıe. Olardyń íshínde – el basshylyǵynyń maınıngke ınvestıtsıyalar tartuǵa nazar audaruy, salany retteushí ūıymnyń jáne ındustrıyamen júıelí dıalogtyń boluy, sondaı-aq «Tsıfrlyq aktıvter turaly» zań túríndegí zańnamalyq baza bar. Sonymen qatar, elímíz derekter ortalyqtarymen jūmys ísteuge mamandar daıyndaıtyn ózíníń tehnıkalyq mektebíne ıe.
Dese de, salanyń damuyna elektr energıyasyn Bíryńǵaı satyp alushydan satyp alu kezínde qūny joǵarylap ketetíní jáne táulíktíń jekelegen saǵattarynda ǵana quat profıtsıtíníń boluy kedergí bolyp otyr. Tańdau jasaǵan kezínde ınvestorlar elektr energıyasynyń qūnyn ǵana emes, sonymen bírge energıyamen jabdyqtaudyń tūraqtylyǵyn, qūqyqtyq jáne salyqtyq retteudíń sapasyn, sondaı-aq memlekettíń ūzaq merzímdí strategıyasyn da eskeredí.
Qazaqstanda krıptorezerv qūrudy, strategıyalyq maınıngtí damytudy jáne elektr stansalaryn jańǵyrtu jóníndegí 70/30 baǵdarlamasyn qosa alǵanda, salany damytudyń jańa modelín qalyptastyru jóníndegí sharalar júzege asyryluda. Būl qadamdar, ındustrıya ókílderíníń píkírínshe, tsıfrlyq maınıng elímízdíń ekonomıkalyq jáne tehnologıyalyq kún tártíbíníń bólígí retínde qarastyrylatyny turaly sıgnaldy qalyptastyrady.
Qazaqstannyń pozıtsıyasyn odan árí nyǵaıtu úshín 70/30 baǵdarlamasyn jetíldírudí jalǵastyru, elektr energıyasyn óndíru úshín ílespe gazdy belsendí paıdalanu, energıya quatyn bólu tásílderín jáne maınıngke salynatyn salyq júktemesín qaıta qarau, sondaı-aq tsıfrlyq maınıngtí damytudyń memlekettík strategıyasyn ázírleu ūsynylady.
Osy sharalardy júzege asyru salanyń ınvestıtsıyalyq tartymdylyǵyn arttyruǵa, energetıkalyq resurstardy tıímdírek paıdalanuǵa jáne jasandy ıntellekt úshín sūranysqa ıe esepteu ınfraqūrylymyn damytu úshín jaǵdaı jasauǵa múmkíndík beredí.