Qazaqstandyq mobılograf árí trevel-bloger Dastan Mūhamedrahım halyqaralyq forumǵa álemdík deńgeıdegí jūldyzdarmen bírge qatysty, – dep habarlaıdy aqshamnews.kz tílshísí.
Dastannyń aıtuynsha, ol Threads áleumettík jelísí ūıymdastyrǵan forumnyń arnaıy qonaǵy bolǵan. Sharaǵa álemdík deńgeıdegí jūldyzdar da jınaldy. Jıyn ayasynda amerıkalyq kásípker, Instagram áleumettík jelísíníń bas dırektory Adam Mosserımen kezdesken.
Būl turaly mobılograf áleumettík jelídegí paraqshasyna jazdy. Ol ózge de jūldyzdy qatysushylarmen bírge qonaq retínde shaqyrtylǵanyn málímdedí.
Būǵan deıín Dastan Mūhamedrahım Kann kınofestıvalí ayasynda Frantsıyada ótetín WIBA Awards marapattau rásímíne shaqyrtu alǵanyn habarlaǵan bolatyn. Onyń aıtuynsha, resmı hatta ol «álemdegí eń úzdík trevel-bloger» dep atalǵan. Saltanatty marapattau rásímí 22 mamyrǵa josparlanǵan.
«Būıyrsa, álemdík deńgeıdegí ūsynystar túsedí. Jaqynda jaqsy jańalyqtar bolady», – dep jazdy bloger.
Dastan Mūhamedrahımníń kontentíne degen qyzyǵushylyq tek Qazaqstanda ǵana emes, shet elderde de artyp keledí. Byltyr onyń vıdeolary Instagram-nyń resmı paraqshasynda jarıyalandy.