Prezıdent álemdík deńgeıdegí jetekshí zerthanalardyń sońǵy derekteríne súıene otyryp, damyǵan jáne damushy ekonomıkalar arasyndaǵy alshaqtyq tez ūlǵaıyp kele jatqanyn atap óttí, – dep habarlaıdy aqshamnews.kz tílshísí.
– Jasandy ıntellektíníń bír erekshelígí – kapıtal da, tehnologıya da kóshbasshylardyń qolyna shoǵyrlanady. Uaqtyly árí batyl sheshím qabyldamasa, erteń «tehnologıyalyq alshaqtyqty» qysqartu qıynǵa soǵady. Būl – Qazaqstan úshín alańdatarlyq ahual. Qazírgí jaǵdaıdy egjeı-tegjeılí saralap, naqty ıntellektualdyq ónímder jasauǵa qabíletímíz qanshalyqty jetetínín anyq túsínu kerek. Elímíz klassıkalyq «Orta tabys daǵdarysyna» tap boldy degen sarapshylardyń píkírímen kelíspeske amal joq. Mūndaı kezde tabıǵı resurstar men arzan jūmys kúshí sekíldí dástúrlí resurstar sarqyla bastaıdy, al ekonomıkalyq ósímge serpín beretín jańa salalar tıístí deńgeıde damymaıdy nemese íske qosylmaıdy. Ekonomıkanyń tūralauyna jol bermeu úshín úlken tsıfrlyq platformalar qūru qajet. Sol arqyly tsıfrlyq ekonomıkaǵa jedel auysu amalyn ízdegen dūrys. Memlekettík derekterdíń bíryńǵaı júıesí bolmasa, jasandy ıntellektíden paıda joq. Osy oraıda memlekettík servısterdí kózge kórínbeıtín, bíraq óte tıímdí operatsıyalyq júıege transformatsıyalau kerek. Sonda shamadan tys byurokratıyalyq talaptardan qūtylamyz. Qazírgí júıe boıynsha sūranys jíberuden bastap sheshím qabyldauǵa deıíngí aralyqqa bírneshe kún nemese bírneshe apta ketedí. Negízí, atalǵan tsıkl bírneshe sekundqa deıín qysqaruǵa tıís. Sol kezde eldegí kapıtal aınalymy jedeldeı túsedí, – dedí Qasym-Jomart Toqaev.