Qaraǵandyda polısıa balalar mekemesiniń tárbıelenýshilerinen aqsha bopsalaýmen aınalysqan uıymdasqan toptyń áreketin áshkereledi, dep habarlaıdy Aqshamnews.kz tilshisi Polisia.kz-ke silteme jasap.
Málimetke sáıkes, 8 qańtarda uıymdasqan qylmysqa qarsy kúres basqarmasynyń jedel qyzmetkerleri prokýratýramen birlesip, áleýmettik osal sanattaǵy azamattarǵa arnalǵan arnaıy memlekettik tólemderden aqsha bopsalaýǵa qatysy bar topty anyqtaǵan. Jedel is-sharalar kezinde óńirdegi balalarǵa arnalǵan mekemelerdiń biriniń tárbıelenýshileri qylmyskerlerdiń qurbany bolǵany belgili boldy.
Aldyn ala derek boıynsha, sońǵy jarty jylda kúdiktiler aldaý, qorqytý jáne kúsh qoldaný arqyly birneshe jábirlenýshiden 10 mln teńgeden astam qarajat ıemdengen. Olar balalardy arnaıy shottardan aqsha sheshýge jáne mıkroqarjy uıymdarynda nesıe rásimdeýge májbúrlegen.
Tintý barysynda kúdiktilerden avtomatty atys qarýyna arnalǵan oqjatarlar jáne júzden astam oq-dári tárkilengen. Atalǵan fakti boıynsha bopsalaý belgilerimen sotqa deıingi tergeý bastalyp, barlyq kúdiktiler ustaldy. Olarǵa 10 jylǵa deıin bas bostandyǵynan aıyrý jazasy qaýpi tónip tur.