5 qańtar, dúısenbide Qazaqstan aýmaǵynda qolaısyz aýa raıy saqtalady. «Qazgıdromet» sınoptıkteri eldiń basym bóliginde sıklon men atmosferalyq fronttardyń áseri jalǵasatynyn málimdedi, dep habarlaıdy Aqshamnews.kz tilshisi.
Sıklon áseri áli de basym
Mamandardyń boljamynsha, respýblıka aýmaǵynyń kóp bóliginde qar jaýyp, boran soǵady. Al batys jáne ońtústik-shyǵys óńirlerde jańbyr men qar aralas jaýyn-shashyn kútiledi.
Tek ońtústik pen ońtústik-batys aımaqtarda jaýyn-shashynsyz aýa raıy boljanyp otyr.
Kóktaıǵaq pen tuman qaýpi bar
Sınoptıkter el boıynsha tuman, kóktaıǵaq jáne jeldiń kúsheıýi múmkin ekenin eskertedi. Mundaı meteojaǵdaılar jol qozǵalysyn qıyndatyp, ásirese tasjoldarda qaýipti jaǵdaı týǵyzýy yqtımal.
Mamandar júrgizýshilerge saqtyq sharalaryn kúsheıtip, al jaıaý júrginshilerge taıǵaqta abaı bolýǵa keńes beredi.