DSM ekí aıdan astam uaqytqa eńbekke jaramsyzdyq paraǵy beríletín aurular tízbesín naqtylaıdy, – dep habarlaıdy aqshamnews.kz tílshísí.
Densaulyq saqtau mınıstrlígí uaqytsha eńbekke jaramsyzdyq merzímí ekí aıdan asatyn aurular tízbesíne ózgeríster engízu jobasyn ázírledí.
Ózgeríster qūjattaǵy auru ataularyn naqtylap, tízbení elímízdíń barlyq óńírínde bírkelkí qoldanuǵa baǵyttalǵan.
Túzetulerge sáıkes, auru ataulary Aurulardyń halyqaralyq jíktemesíndegí (AHJ) tıístí kodtarmen tolyqtyrylady. Būl aurudy dálírek anyqtauǵa jáne tízbení ís júzínde qoldanu kezínde ártúrlí túsíndíruge jol bermeuge múmkíndík beredí.
Mınıstrlíktíń túsíndíruínshe, túzetuler naqtylau sıpatynda jáne qoldanystaǵy retteudí jetíldíruge, sondaı-aq aurular tízbesímen jūmys ísteudíń bíryńǵaı tásílderín qalyptastyruǵa baǵyttalǵan.
Jobany qabyldau zańnama normalaryn bírkelkí qoldanuǵa, jekelegen aurulardy ártúrlí túsíndírudí boldyrmauǵa jáne olardy anyqtau dáldígín arttyruǵa múmkíndík beredí.
Joba "Ashyq NQA" portalynda 5 qazanǵa deıín qoǵamdyq talqylauǵa jarıyalandy.
Qoldanystaǵy tízbede 434 auru túrí engízílgen.