Qalalyq bílím berudegí jańa tehnologıyalardyń ǵylymı-ádístemelík ortalyǵy, №202 mektep-gımnazıyasy jáne Jambyl Jabaev ádebı-memorıaldy muzeıíníń bírlesuímen «Jambyl Jabaev aıtystarynyń kórkemdík-estetıkalyq tabıǵaty» degen taqyrypta mūǵalímderge arnalǵan qalalyq semınar óttí.
Būl basqosu mazmūnǵa da, mánge de toly taǵylymdy shara boldy. Aıtys óneríníń tereń tabıǵatyn talqylap qana qoımaı, Jambyl atamyzdyń baı mūrasyn jańa qyrynan tanuǵa múmkíndík tudy. Jambyl aqynnyń nemeresí Saltanat Tezekbaıqyzy semınarǵa arnaıy qonaq bolyp qatysty. Sondaı-aq atalǵan sharaǵa Jambyl Jabaev atyndaǵy ádebı-memorıaldy muzeı kóshpelí kórmesímen keldí. Semınar barysynda №202 mektep-gımnazıya men Jambyl Jabaev atyndaǵy ádebı-memorıaldy muzeı arasynda ózara yntymaqtastyq memorandumǵa qol qoıyldy.
Ūly tūlǵalardyń mūrasyn uaqyt talabyna saı zamanauı formatta nasıhattau – bílím men tehnologıyanyń toǵysqan tūsy. Osy maqsatta ūstazdardyń eńbegímen Jambyl Jabaev muzeıíníń vırtualdy 3D nūsqasy ázírlendí. Sonymen qatar, jobany kópshílíkke tanystyru úshín arnaıy saıt ashyldy. Būl – Jambyl álemín jańa tūrǵyda tanytyp, jas ūrpaqqa ūly aqyn ómírín tsıfrly keńístíkte jetkízetín mańyzdy bastama.
Sharany ūıymdastyrǵan №202 mektep-gımnazıyanyń qazaq tílí men ádebıetí pání mūǵalímderí Qūralaı Sherıeva, Nazgúl Úrkímbaeva, Ǵalıya Elshíbaeva syndy ūstazdardyń qajyrly eńbegí semınar mazmūnyn baıytyp, Jambyl mūrasyn jańa qyrynan tanytuǵa jol ashty.
Aıta keterlík jaıt, būl taǵylymdy basqosu jyr dúldúlí Jambyl Jabaevtyń tuǵanyna 180 jyl toluyna oraılastyrylǵan ís-sharalardyń bastamasy íspettí boldy.