Májílís deputaty Ermūrat Bapı bas prokuror Berík Asylovqa deputattyq saual joldap, áleumettík jelílerde belsendí psevdodínı tūlǵalardyń qoǵamǵa tóndíríp otyrǵan qaupín kóterdí, – dep habarlaıdy aqshamnews.kz tílshísí.
Deputattyń aıtuynsha, ınternet keńístígínde ózín dínı avtorıtet retínde kórsetetín, alaıda resmı dínı qūrylymdarǵa qatysy joq adamdar halyq sanasyna yqpal etíp, ūlttyq qūndylyqtarǵa syzat túsíríp jatyr.
"Dúmshe dogmany tyqpalaǵan būl qarabaıyr díndarlar ūlttyq ūstanymdy írítíp, memleketímíz ben qoǵamnyń taǵanyn teńseltude. Zańdy belshesínen basyp, oıyna kelgen sharıǵatyn shatyp otyratyn mūndaılarǵa tosqauyl qoıyluy kerek", – dedí Ermūrat Bapı.
Ol juyrda qoǵamda rezonans tudyrǵan bírneshe oqıǵany mysalǵa keltírdí. Sonyń bírí – podkasttardyń bírínde ózín ımam retínde tanystyrǵan azamattyń úsh áıelí baryn aıtyp, sońǵy áıelín shákírtíne «syıǵa tartqanyn» ashyq málímdeuí.
Deputat mūndaı málímdeme tek moralǵa jat áreket emes, sonymen qatar azamattyq neke jóníndegí zańnamany ayaqqa taptau, dástúrlí dín qūndylyqtaryn mansūq etu ekenín aıtty.
"Adamdy syıǵa tartu – būl adam saudasy sanatyndaǵy qylmys sanaluy tıís. Adam túgílí, haıuanǵa janashyrlyq tanytudy dárípteıtín dín ókílí óz áıelín haıuannan beter etíp, ashyq syıǵa beruí – qoǵamdyq jazǵyruǵa para-par qylmys", – dedí Ermūrat Bapı.
Sondaı-aq, deputat Nauryz meıramyn ıslamǵa jat mereke retínde sıpattaǵan beınerolıkterge de toqtaldy. Onyń sózínshe, mūndaı málímdemeler halyqtyń ǵasyrlar boıy qalyptasqan salt-dástúríne, ūlttyq mádenıetí men bíregeılígíne kúmán keltíruge baǵyttalǵan.
"Būl – tabıǵatpen bírge túleıtín merekení joqqa shyǵaru ǵana emes, ūlttyq tamyrymyzǵa kúmán keltíru. Mūndaı terís nasıhat qoǵamdy íshten írítíp barady", – dedí deputat.
Májílís deputaty ákímshílík jaza mūndaı jaǵdaılardyń aldyn aluǵa jetkílíksíz ekenín aıtyp, dínı arazdyqty qozdyruǵa jáne áleumettík jelíler arqyly terís dínı nasıhat taratuǵa qatysty jauapkershílíktí kúsheıtudí ūsyndy.
"Eldegí dínı negízdegí qoǵamdyq jarqyshaq asqynyp ketpesín desek, ákímshílík jaza azdyq etedí. Áleumettík resurstar arqyly terís dínı nasıhat pen dínı arazdyqty qozdyrushy tūlǵalardy qylmystyq jauapkershílíkke tartuǵa múmkíndík beretín zań normalaryn qarastyru qajet", – dedí Ermūrat Bapı.
Onyń píkírínshe, eń úlken qauíp – mūndaı uaǵyzdardyń jastar sanasyna áser etuí. Deputat syrttan síńgen terís dínı túsíníkter jas buyndy ūlttyq salt-dástúrden ajyratyp, eldík múddeden alshaqtatuy múmkín ekenín aıtty.
"Būl uaǵyzshy-symaq tobyr bízdíń jas óskín ūrpaqty, eldíń bolashaǵyn ulauda. Buyny bekímegen jastardyń sanasyna jelímdeı jabysqan mūndaı uaǵyzdar olardy ūlttyq qūndylyqtardan aıyryp, joǵalǵan ūrpaqqa aınaldyruy múmkín", – dedí Ermūrat Bapı.
Sondaı-aq, ol búgínde jastardyń dínı tanymy kóbíne meshítte emes, áleumettík jelílerde qalyptasyp jatqanyn aıtty. Sondyqtan resmı dínı ınstıtuttar tsıfrlyq keńístíkte belsendírek boluy kerek dep esepteıdí.
"Eger būl resurstarda resmı ınstıtuttardyń júıelí, bedeldí jáne zamanauı ūstanymy tapshy bolsa, bos qalǵan keńístíktí qarabaıyr árí qauíptí propaganda toltyrady", – dedí Ermūrat Bapı.
Deputat sóz sońynda Qazaqstan mūsylmandary dínı basqarmasynyń jūmysyna da nazar audardy. Onyń aıtuynsha, resmı dínı qūrylymdar el íshíndegí jáne onlaın ortadaǵy mūndaı dínı kıkíljíńderge der kezínde ún qatyp, qoǵamdy terís uaǵyzdardyń yqpalynda qaldyrmauy tıís.
"QMDB tsıfrlyq keńístíkke shyǵyp, el íshí men onlaın ortadaǵy dínı kıkíljíńge der kezínde reaktsıya jasauy kerek. Qoǵam zūlym uaǵyzdardyń qorshauynda qalmauǵa tıís", – dedí Ermūrat Bapı.