Almatyda Mastercard, Almaty Tourism Bureau jáne Visit Almaty bírlesíp daıyndaǵan «Almatydaǵy turızm 2025» esebíníń tanystyrylymy óttí, – dep habarlaıdy aqshamnews.kz tílshísí.
Esep tólem júıesíníń anonımdendírílgen tranzaktsıyalyq derekterí men Mastercard Tourism Insights analıtıkalyq platformasy negízínde ázírlengen.
Jalpy alǵanda, Qazaqstanda turızm salasy qarqyndy damyp otyr, al Almaty Ortalyq Azıyadaǵy turıstík ósímníń negízgí draıverleríníń bíríne aınalyp keledí. Tabıǵı parkterdíń jaqyndyǵy, bíregeı mádenı orta, halyqaralyq auqymdaǵy ís-sharalar sanynyń artuy jáne áue qatynasynyń keńeyuí qalanyń turıster úshín tartymdylyǵyn kúsheıtíp, ekonomıkasynyń damuyna oń yqpal etude. Esepke sáıkes, 2025 jyly taldanǵan 15 elden kelgen sheteldík turısterdíń jalpy shyǵyny 40%-ǵa artqan.
Álemdík trendter jáne Qazaqstan
Qazaqstan tabıǵı áleuetí jaǵynan óńírdegí kóshbasshylardyń bírí sanalady. Tabıǵatty turısterdí tartudyń negízgí ózegí retínde paıdalana otyryp, el ózíníń tartymdylyǵyn oqıǵalyq turızm arqyly odan árí arttyra alady.
2025 jyl Qazaqstandaǵy oqıǵalyq turızmníń áleuetí joǵary ekenín taǵy bír márte dáleldedí. 2025 jyly kúzde Almatyda ótken UEFA Chempıondar lıgasynyń matchtary, sondaı-aq halyqaralyq pop-jūldyzdardyń kontsertterí ekonomıkalyq jaǵynan eń joǵary tıímdílík kórsettí.
Qazaqstanǵa, ásírese Qytaı men Úndístan sıyaqty Azıya naryqtary tarapynan qyzyǵushylyqtyń artuy ekoturızmge sūranystyń ósuí sekíldí jahandyq trendtermen úndesíp otyr. Būl faktorlar, sondaı-aq Azıya elderíndegí orta taptyń ūlǵayuy Qazaqstan men Almaty úshín turıstík salany odan árí damytuǵa jańa múmkíndíkter qalyptastyrady.
Turıst profılí men mínez-qūlqy
Basqa qalalarmen salystyrǵanda, Almaty demalys pen ekoturızm ortalyǵy retíndegí ornyn kún sanap nyǵaıtyp keledí. Lifestyle-turızmge betbūrys Ortalyq Azıya men Kavkazdaǵy ūqsas qalalarmen salystyrǵanda mūnda jyldamyraq baıqalady, al ískerlík turızmníń ósu qarqyny bírshama bayau.
Sonymen qatar, Almaty negízgí seríktes naryqtar úshín mańyzdy ekonomıkalyq ortalyq bolyp qala beredí. Máselen, Túrkıyadan keletín qonaqtardyń úshten bírí (34%) Almatyǵa ískerlík maqsatpen keledí. Sondaı-aq, Italıyadan (28%) jáne Qytaıdan (20%) keletín sayahatshylardyń da edáuír bólígí saparyn osy maqsatta josparlaıdy.
Almatyǵa keletín turısterdíń negízgí bólígín jūppen jáne jeke sayahattaushylar alyp otyr. Al jańa ósím baǵyty retínde otbasylyq turızm alǵa shyǵyp otyr. Qazírgí tańda būl segmentte Parsy shyǵanaǵy elderí kósh bastap tūr: Saud Arabıyasy, BAÁ jáne Katardan keletín qonaqtardyń tıísínshe 35%, 35% jáne 30%-y Almatyǵa otbasymen bírge keledí. AQSh, Ońtústík Koreya jáne Frantsıya jeke sayahattaushylardyń negízgí naryqtary bolyp qala beredí: būl elderden keletín turısterdíń tıísínshe 50%, 48% jáne 48%-y Almatyǵa jalǵyz ózí sapar shegedí.
Jahandyq qyzyǵushylyq artyp keledí
Almaty — Ortalyq Azıyadaǵy ınternette eń kóp ízdeletín baǵyt. Qala halyqaralyq deńgeıde keńínen moıyndaldy: ol CNN Travel nūsqasy boıynsha 2025 jylǵa arnalǵan álemdegí úzdík turıstík baǵyttar tízímíne eníp, Ortalyq Azıyanyń «Capital of Cool» qalasy retínde ataldy. Sondaı-aq, Bloomberg Almatyny 2026 jyly baruǵa ūsynylatyn 25 úzdík baǵyttyń qataryna qosty (sílteme).
2025 jyly Almatyǵa degen qyzyǵushylyq shamamen 1,5 esege artty, al sapardy josparlau merzímí orta eseppen 8 kúnge erterek bastalǵan. 2024 jylmen salystyrǵanda Almatyǵa áue bıletterín ízdeu sany 73%-ǵa óstí, al 2023 jylmen salystyrǵanda qalanyń tanymaldyǵy shamamen 2,5 esege artqan. Ízdeu kólemí boıynsha alǵashqy tórt el — Qytaı, Úndístan, BAÁ jáne Túrkıya — naqty kelushíler sany boıynsha da kósh bastap tūr. Būl tsıfrlyq qyzyǵushylyq pen naqty turısterdíń ózara joǵary sáıkestígín kórsetedí.
Atalǵan halyqaralyq basylymdardyń baǵalauynsha, damyǵan áue qatynasy jelísí men lıberaldy vızalyq rejım Almatynyń álemdegí eń ashyq árí bolashaǵy zor turıstík habtardyń bírí retíndegí mártebesín nyǵaıta túsedí.
Infraqūrylym jáne bolashaq
2025 jyly qonaqtardyń qonaq úı servısíne qanaǵattanu deńgeıí 14%-ǵa óstí. Soǵan qaramastan, halyqaralyq standarttar men óńírlík kóshbasshylar deńgeıíne jaqyndau úshín álí de aıtarlyqtaı áleuet saqtalyp otyr.
2026 jyly áue qatynasynyń geografıyasy odan árí keńeıedí dep kútílude, ásírese Qytaı baǵyty boıynsha ósím aıqyn bolmaq (sílteme). 2025 jyly jeltoqsanda Chenduǵa tíkeleı reıstíń íske qosyluy jáne 2026 jyly Shanhaı men Guanchjouǵa jańa baǵyttardyń ashyluy nátıjesínde Almaty men Qytaı qalalary arasyndaǵy reısterdíń jalpy sany aptasyna 84-ke deıín jetedí. Būl Almatynyń óńírdegí qytaı turızmí úshín negízgí torap retíndegí rólín nyǵaıtuǵa múmkíndík beredí. Sondaı-aq, 2026 jyly qalada jańa mádenı jáne ǵylymı keńístíkterdíń ashylmaq. Būl óz kezegínde Almatynyń otbasylyq jáne mádenı audıtorıya úshín tartymdylyǵyn arttyra túsedí.
«2025 jyl Almatynyń turıstík salasynyń damuy úshín mańyzdy kezeń boldy. Qala Ortalyq Azıyadaǵy jetekshí turıstík destınatsıya retíndegí ornyn nyǵaıtyp, Bloomberg pen CNN nūsqalary boıynsha álemníń úzdík 25 baǵytynyń qataryna endí, halyqaralyq jolaushylar sanynyń ósuín kórsettí jáne negízgí sheteldík naryqtardaǵy qatysu ayasyn keńeıttí. Almaty tau klasterín, ískerlík jáne oqıǵalyq turızmdí damytu, sondaı-aq qala brendıngín halyqaralyq deńgeıde ílgeríletu boıynsha júıelí sharalar qabyldap keledí. Ūsynylǵan esep turızm salasyndaǵy strategıyalyq josparlau men basqarushylyq sheshímder qabyldau úshín mańyzdy analıtıkalyq negíz bolyp tabylady», — dedí Almaty qalasy Turızm basqarmasynyń basshysy Ǵalıya Toqseıítova.
«Bíz úshín turızm — būl tek sandar men marshruttar ǵana emes, eń aldymen adamdar, olardyń tańdauy men áserí. Mastercard Tourism Insights platformasy arqyly turısterdíń mínez-qūlqyn taldau bízge qonaqtardyń qajettílígín tereńírek túsínuge, Almaty Tourism Bureau-men jáne eldíń búkíl turıstík salasymen ózara baılanysty nyǵaıtuǵa kómektesedí. Bíz turızm Qazaqstan ekonomıkasynyń ósuíne serpín beretín mańyzdy draıverlerdíń bíríne aınala alady dep senemíz. Al Almaty búgínde Ortalyq Azıyadaǵy negízgí tartymdy baǵyttardyń jáne jetekshí turıstík habtardyń bírí retínde qalyptasyp keledí. Bíz qala ákímdígí men Almaty Tourism Bureau-ny súıíktí qalamyzdyń turıstík áleuetín tolyq ashu jolynda qoldauǵa quanyshtymyz», — dedí Mastercard kompanıyasynyń Qazaqstan jáne Ortalyq Azıya boıynsha bas dırektory Sanjar Jamalov.