Elímízde profılaktıkalyq skrınıngter memleket kepíldík bergen medıtsınalyq qyzmetter paketíne engízílgen. Būl turaly Densaulyq saqtau mınıstrí Aqmaral Álnazarova aıtty.
Prezıdenttíń «Ádílettí Qazaqstan: zań men tártíp, ekonomıkalyq ósím, qoǵamdyq optımızm» atty Qazaqstan halqyna Joldauyn jáne ózge de tapsyrmalaryn júzege asyru sheńberínde Úkímet Densaulyq saqtau mınıstrlígí tarapynan halyqqa medıtsınalyq qyzmetterdíń sapasy men qoljetímdílígín arttyru boıynsha jūmystar júrgízíp jatyr.
MÁMS júıesí engízílgennen berí densaulyq saqtau salasyn qarjylandyru kólemí úsh esege artty. Būl halyqtyń joǵary tehnologıyalyq jáne qymbat qyzmetterge qoljetímdílígín keńeıtuge múmkíndík berdí. Endí barlyq medıtsınalyq kómek naqty ekí bólíkke bólínedí: el tūrǵyndarynyń barlyǵyna memleket tolyq kepíldík beretín bazalyq paket jáne saqtandyrylǵan azamattarǵa arnalǵan keńeıtílgen saqtandyru paketí.
«Eń kóp taralǵan áleumettík mańyzy bar aurular boıynsha skrınıngter saqtandyru mártebesíne qaramastan barlyq azamattar úshín qoljetímdí. Bıyldan bastap 50 jastan asqan er adamdar úshín qaterlí ísíkterdí, júrek-qan tamyrlary aurularyn jáne mı qan aınalymynyń jítí būzylystaryn erte anyqtau úshín skrınıngtíń jańa túrlerí engízíledí. Áleumettík mańyzy bar aurularǵa shaldyqty degen kúdík tuyndaǵan jaǵdaıda tekseruler osy zań ayasynda barlyǵyna da qoljetímdí bolady», — dep atap óttí Aqmaral Álnazarova.
Osylaısha, reforma qyzmetterdegí túsínbeushílíktí joıyp qana qoımaı, búkíl halyq úshín aurulardy erte anyqtau men aldyn aluǵa basymdyq beríledí.