Osy salada jūmys ísteıtín otyzdan astam arnaıy mekeme bar, dep habarlaıdy aqshamnews.kz tílshísí.
Prezıdent ūlttyq sport túrlerín damytu – Úkímet pen ákímdíkterdíń aldynda tūrǵan asa mańyzdy míndet ekenín atap aıtty.
– Qazír osy salada jūmys ísteıtín otyzdan astam arnaıy mekeme bar. Astanada Ūlttyq sport unıversıtetí ashyldy. Būl oqu orny sport salasyndaǵy kásíbı kadrlardy dayarlauǵa sheshushí úles qosady dep josparlap otyrmyz. «Ūlttyq jáne at sporty túrlerí ortalyǵy» da tabysty qyzmet ete bastady. Elímízde jyl saıyn qazaq kúresí, toǵyzqūmalaq, asyq atu, kókpar, báıge jáne basqa da sport túrlerí boıynsha myńnan astam jarys ótkízíledí. Ūlttyq sport túrleríníń festıvalí, «Aq bıdaı» auyl oıyndary, «Qazaqstan barysy» dodasy tūraqty túrde ūıymdastyrylady. Eń bastysy, ūlttyq sport pen olımpıadalyq sport túrlerí zań júzínde teń mártebege ıe boldy. Búgínde qazaq sportynyń bedelí zor. Mūny búkíl álem moıyndaıtyn boldy. Qazaqstan sportshylary árdaıym úzdíkter qatarynda. Kúní keshe dańqty sportshymyz Elena Rybakına tennısten álemníń bírínshí raketkasy atandy. Būl – shyn mánínde óte úlken jetístík. Men Elena Rybakınany qūttyqtadym, onyń eńbekqorlyǵy men sheberlígín atap ótíp, boıyndaǵy jeke mádenıetíníń joǵary ekeníne erekshe baǵa berdím, – dedí Qasym-Jomart Toqaev.
Prezıdent sport salasyndaǵy jetístíkterge Úkímettíń, tıístí mınıstrlíktíń tabandy jūmysynyń alǵashqy nátıjesí retínde oń baǵa beríp, aldymyzda álí talaı míndet tūrǵanyn eske saldy.
– Elímízde túrlí halyqaralyq dodalar ótkízílude. Bıyl Astanada dástúrlí sport pen tsıfrlyq tehnologıyany ūshtastyrǵan bíregeı jarys – «Bolashaq oıyndary» sáttí óttí. Kelesí jyly elorda tórínde jetí bírdeı álem chempıonaty jalauyn kóteredí. Óte auqymdy jūmysty atqaruymyz kerek, bíraq mūnyń bárí – elímízdíń abyroıyna, bedelíne óte qajettí halyqaralyq ís-sharalar. Al 2029 jyly Almatyda X Qysqy Azıya oıyndary ótedí. Osy mańyzdy sharalardyń bárín sapaly árí joǵary deńgeıde ūıymdastyru qajet, – dedí Memleket basshysy.
Qasym-Jomart Toqaev sózín qorytyndylaı kele, sportshylardyń jeńísí, eń aldymen, óskeleń ūrpaqqa jíger beretínín aıtty.
– Jastar sízderge qarap boı túzeıdí. Būl – úlken mártebe jáne zor jauapkershílík. Jeńímpaz, chempıon bolu – bír basqa, jeńímpazǵa, chempıonǵa laıyq úlgí kórsetu – bír bólek. Jas ūrpaqty tabandy, qaısar, shydamdy bolumen qatar, olardy ádeptí, mádenıettí, tıyanaqty boluǵa úıretu óte mańyzdy. Sonda jastarymyzdyń tání de, jany da sau, sanasy sergek bolady, – dedí Qasym-Jomart Toqaev.