Astana AI Film Festival halyqaralyq AI-fılmder baıqauy álemníń túkpír-túkpíríndegí kreatorlardan ótíním qabyldaudy bastady, – dep habarlaıdy aqshamnews.kz tílshísí.
Astana AI Film Festival festıvalíníń resmı saıty aaiff.ai álemníń túkpír-túkpíríndegí kreatorlardan halyqaralyq AI-fılmder baıqauyna qatysuǵa ótíním qabyldaudy bastady. Astanada ótken baspasóz konferentsıyasynda jobanyń tūjyrymdamasy, baıqau baǵdarlamasy jáne íske qosu kezeńí tanystyryldy.
Festıval ūıymdastyrushysy Almas Jálıdíń aıtuynsha, baıqau baǵdarlamasy ekí sektsıyadan tūrady: «The future worth living in» («Ómír súruge tūrarlyq bolashaq») taqyrybyna arnalǵan negízgí sektsıya jáne úzdík rejıssura, vızualdy tíl, oqıǵa, kontseptsıya jáne keıípker nomınatsıyalary boıynsha ashyq sektsıya.
Baıqaudyń negízgí talaby — fılmníń full AI tehnologıyalary arqyly jasaluy. Yaǵnı, jasandy ıntellekt qosymsha qūral retínde emes, tuyndyny jasaudyń negízgí ınstrumentí retínde qoldanyluy tıís.
«Festıval 2026 jylǵy 28 qyrkúıek pen 1 qazan aralyǵynda Astanada Astana AI Week — jasandy ıntellekt aptalyǵy ayasynda ótedí. Būl AAIFF-tí eldegí írí tehnologıyalyq ís-sharalarmen baılanystyryp, festıvaldíń halyqaralyq mártebesín kúsheıtedí», — dedí Almas Jálı.
Baıqauǵa qatysu tegín jáne jas erekshelígíne nemese kásíbı tájírıbesíne qaramastan barsha nıet bíldírushílerge ashyq. Qatysushylar ūzaqtyǵy 10 mınutqa deıíngí qysqametrajdy AI-fılm ázírlep, ony jobanyń sıpattamasymen bírge aaiff.ai festıval platformasyna júkteuí qajet.
«Ótíním festıvaldíń resmı saıty arqyly qabyldanady. Jūmysty ekí jolmen jíberuge bolady: YouTube platformasyna júktep, síltemesín kórsetu nemese Google Drive servısíne júktep, síltemesín joldau. Barlyq ótínímder ūıymdastyrushylardyń bíryńǵaı bazasynda tírkeledí jáne júrgízíledí. Sondyqtan avtorlarǵa ótíním mártebesín baqylauda ūstaudyń qajetí joq», — dedí joba avtorlarynyń bírí Aızatulla Husseın.
YouTube platformasyna júktelgen vıdeolardyń sıpattamasynda míndettí túrde «Special for Astana AI Film Festival» tírkesí, avtordyń aty-jóní jáne #SpecialForAAIFF heshtegí kórsetíluí tıís.
Íríkteu qorytyndysy boıynsha AAIFF komandasy men halyqaralyq sarapshylar negízgí sektsıyadan 10 jáne ashyq sektsıyadan 15 jūmysty tańdap alady. Fınalısterdí kınoındustrıya, AI-qoǵamdastyq jáne creative tech salasynyń ókílderínen qūralǵan halyqaralyq qazylar alqasy baǵalaıdy.
Ótíním qabyldau 2026 jylǵy 15 tamyzǵa deıín jalǵasady. Baıqau fınalısterí qyrkúıek aıynda jarıyalanyp, kórsetílímder men jeńímpazdardy marapattau rásímí Astana AI Week ayasynda Astana qalasynda ótedí.
Atalmysh joba - jasandy ıntellekt tehnologıyalarynyń kómegímen jasalǵan fılmderge arnalǵan halyqaralyq festıval. Alań avtorlardy, digital-kreatorlardy, tehnologıyalyq kompanıyalar ókílderín, sarapshylar men ınvestorlardy bíríktíredí. Festıvaldíń jalpy júlde qory 1 mıllıon AQSh dollaryn qūraıdy.
Festıval ayasynda kórsetílímder, AI-kontentke arnalǵan konferentsıya, paneldík píkírtalastar, sondaı-aq avtorlar men prodyuserlerge arnalǵan pitch-sessıyalar ūıymdastyrylady. Ūıymdastyrushylar festıvaldí jyl saıyn ótkízíp, ony AI-kıno men tsıfrlyq shyǵarmashylyqtyń jańa baǵyttaryn damytuǵa arnalǵan tūraqty halyqaralyq platformaǵa aınaldyrudy josparlap otyr.
Festıvaldíń resmı saıty: aaiff.ai