Koreya Respublıkasy, Seul qalasy
Qasym-Jomart Toqaev Han Son Sukty Koreya Úkímetíníń basshysy bolyp taǵaıyndaluymen qūttyqtap, asa jauapty qyzmetíne tabys tíledí.
– Búgínde qazaq-koreı qarym-qatynastary tūraqty túrde jaqsy damyp kele jatyr. Strategıyalyq áríptestígímízdíń ayasynda qos tarap úshín de paıdaly bolatyn kóptegen mańyzdy bastamalar júzege asyryluda. Sízdíń elíńíz Qazaqstannyń on írí sauda jáne ınvestıtsıyalyq seríktesíníń qataryna kíredí. Qazaqstanda koreı kapıtaly bar 1 myńnan astam bírlesken kásíporyn jūmys ísteıdí. Bíraq aldymyzda tūrǵan jauapty míndet óte kóp. Sízdermen bírge josparlarymyzdy oıdaǵydaı íske asyramyz dep oılaımyn, – dedí Qazaqstan Prezıdentí.
Memleket basshysy Qazaqstanda ońtaıly ískerlík jáne ınvestıtsıyalyq klımat jolǵa qoıylǵanyn atap óttí.
– Elímízde Koreyanyń írí korporatsıyalarymen qatar, shaǵyn jáne orta bıznes ókílderíníń kásíppen aınalysuyna qolaıly jaǵdaı jasalǵan. Osy baǵytta qazaq-koreı úkímetterí qajettí sharalardy atqaryp jatyr. Atap aıtqanda, Sauda-ekonomıkalyq jáne ǵylymı-tehnıkalyq yntymaqtastyq jóníndegí úkímetaralyq komıssıya, sondaı-aq Ískerlík keńes tıímdí jūmys ístep keledí. Sonymen qatar qajettí qūqyqtyq negíz qalyptasqan, – dedí Qasym-Jomart Toqaev.
Prezıdent Premer-mınıstrge qazaq-koreı kásípkerleríníń dóńgelek ústelíne qatysqany úshín alǵys aıtty. Memleket basshysy jıyn ayasynda qol qoıylatyn mańyzdy qūjattar ekíjaqty yqpaldastyqty odan árí tereńdete túseríne sením bíldírdí.
Qasym-Jomart Toqaev Prezıdent Lı Chje Myońmen júrgízetín kelíssózderdíń mańyzyna erekshe nazar audardy. Būl kezdesu ekíjaqty qarym-qatynastar tarıhyndaǵy jańa kezeńge jol ashady.
Būdan bólek, Qasym-Jomart Toqaev úkímetter arasyndaǵy yqpaldastyqtyń basym baǵyttaryna toqtaldy.
– Kún tártíbínde ekíjaqty tauar aınalymyn ekí ese arttyru míndetí tūr. Ol úshín kólemdí ūlǵaıtyp qana qoımaı, saudanyń qūrylymyn ózgertíp, qosylǵan qūny joǵary tauarlar nomenklaturasyn keńeıte túsu qajet. Sondyqtan Qazaqstan men Koreyanyń sauda-ekonomıkalyq jáne ınvestıtsıyalyq yntymaqtastyǵynyń 2027-2030 jyldarǵa arnalǵan keshendí baǵdarlamasyn ázírleu óte ózektí dep bílemín. Sonymen qatar lokalızatsıyalau jáne ónímdí úshínshí naryqqa shyǵaru boıynsha perspektıvtí jobalardy qamtı otyryp, óndírístík kooperatsıyanyń jeke jol kartasyn daıyndau mańyzdy dep sanaımyn, – dedí Prezıdent.
Sóz sońynda Memleket basshysy Qazaqstannyń Koreyamen yntymaqtastyqty jan-jaqty nyǵaıtuǵa beıíl ekenín rastady.
Premer-mınıstr Han Son Suk Koreya Respublıkasy ózara baılanystardy odan árí tereńdetuge múddelí ekenín aıtty.
– Prezıdent myrza, Sízben júzdesu – men úshín zor mártebe. Ózíńíz atap ótkendeı, Qazaqstan Koreya Respublıkasynyń Ortalyq Azıyadaǵy írí sauda jáne ınvestıtsıyalyq seríktesí sanalady. Osy sammıt ayasynda ekí el arasyndaǵy yntymaqtastyq, ásírese, ekonomıka, energetıkalyq tasymal tízbegí baǵyttarynda jandana túsedí dep úmíttenemín. Sondaı-aq Koreya Alatau qalasyn damytuda Qazaqstannyń áleuettí seríktesteríníń bírí bolady dep oılaımyn, – dedí Koreya Respublıkasynyń Úkímet basshysy.
Premer-mınıstrdíń aıtuynsha, ekíjaqty qarym-qatynasqa ekonomıkalyq bastamalar ǵana emes, sonymen qatar qarqyn alǵan mádenı-gumanıtarlyq baılanystar jáne azamattardyń barys-kelísíníń kóbeyuí de erekshe serpín beríp otyr.
Kezdesu barysynda kólík-logıstıka, asa mańyzdy materıaldar, mashına jasau, tsıfrlandyru jáne jasandy ıntellekt pen medıtsınany damytu salalaryndaǵy bírlesken jobalardy íske asyru jospary talqylandy.
