Pavlodar oblysynda 2019 jyly otbasylyq jıyn ótkízu úshín bírneshe jerden nesıe alyp, keıín ony óteı almaı qalǵan ekí balanyń anasy sotta jeńíske jetíp, resmı túrde bankrot dep tanyldy, – dep habarlaıdy aqshamnews.kz tílshísí.
Ís materıaldaryna sáıkes, áıeldíń bankter aldyndaǵy jalpy bereshegí 6 344 644 teńgege jetken. Alǵashynda bírínshí satydaǵy sot onyń tūraqty tabysy joq ekenín negízge alyp, aryzyn kerí qaıtarǵan.
Alaıda būl sheshímmen kelíspegen boryshker apellyatsıyalyq shaǵym túsíríp, ístíń qaıta qaraluyna qol jetkízdí. Pavlodar oblystyq soty ístí zerdeleu barysynda qaryz kólemí zańda belgílengen shekten asatynyn jáne míndettemelerdíń 12 aıdan astam uaqyt boıy tólenbegenín eskergen.
Sot alqasy sondaı-aq qarjy basqarushysy qaryz somasyn dūrys eseptemegenín anyqtap, áıeldíń áreketínen eshqandaı aram pıǵyl baıqalmaǵanyn atap óttí. Sudyalar tūraqty jūmys pen tabystyń bolmauy azamatty bankrot dep tanudan bas tartuǵa negíz emes ekenín naqtylady.
Nátıjesínde bírínshí satydaǵy sot sheshímíníń kúshí joıylyp, ekí balanyń anasyna qatysty bankrottyq rásímín qoldanu turaly jańa sheshím zańdy kúshíne endí.
Aıta keteıík, būǵan deıín Májílís deputattary halyqtyń nesıe alyp toı jasau ádetín bírneshe ret synǵa alǵan bolatyn. 2025 jyly deputat Ardaq Nazarov otbasylyq merekeler úshín bankterden qaryz beruge tolyqtaı tyıym saludy ūsynǵan edí.