Parlamenttik reformaǵa qatysty 350-den asa usynys túsken. Bul týraly Memlekettik keńesshi Erlan Qarın málimdedi, - dep habarlaıdy aqshamnews.kz tilshisi.
Parlamenttik reforma jónindegi jumys tobynyń qazan aıynda ótken alǵashqy otyrysynda Memleket basshysy kelip túsken usynystardy jan-jaqty pysyqtap, parlamenttik júıeni jańǵyrtý jóninde naqty usynymdar ázirleý qajet ekenin atap ótken edi.
Otyrystan keıin aldaǵy parlamenttik reformaǵa qatysty usynystar jınaý úderisi bastaldy. Jumys tobynyń músheleri, sondaı-aq Amanat, Aýyl, Respublica, Aq jol, QHP, JSDP saıası partıalary ózderiniń kózqarastary men usynymdaryn joldady. Sonymen qatar E-otinish jáne E-gov platformalary arqyly azamattardan, sarapshylardan, qoǵam belsendilerinen 350-den astam usynys túsken.
Keshe Parlamenttik reforma jónindegi jumys tobynyń kezekti otyrysy ótip, bolashaq bir palataly Parlament modelin qalyptastyrýǵa qatysty máselelerdiń birinshi blogy qaraldy. Atap aıtqanda:
-
bir palataly Parlament quramyndaǵy depýtattar sany;
-
Parlament depýtattaryna qoıylatyn biliktilik talaptary;
-
depýtattardy saılaý tártibi;
-
jańa Parlamenttiń ókilettilik merzimi;
-
Parlamenttegi kvotalar (prezıdenttik, partıalyq tizim).
Eki saǵattan astam ýaqytqa sozylǵan konstrýktıvti talqylaý barysynda túrli sarapshylyq ustanymdar men paıymdy pikirler ortaǵa salyndy. Otyrysta aıtylǵan usynystardy qosymsha egjeı-tegjeıli saralap, júıeleý týraly sheshim qabyldandy.
Memlekettik keńesshi Erlan Qarınniń aıtýynsha, jumys tobynyń aldaǵy otyrystarynda parlamenttik júıeni jańǵyrtýdyń basqa da baǵyttary qarastyrylatyn bolady. Reforma sheńberindegi usynystar jınaqtalyp, bir palataly Parlament modelin qalyptastyrý boıynsha keshendi qorytyndy usynymdar ázirleý josparlanyp otyr.