Memleket basshysy IV Qytaı halyqaralyq ımporttyq tauarlar kórmesíníń ashylu rásímínde beıneúndeu jasady
Qasym-Jomart Toqaev ózíníń beıneúndeuínde jıynǵa qatysushylardy IV Qytaı halyqaralyq ımporttyq tauarlar kórmesíníń ashyluymen qūttyqtady dep habarlaıdy almaty-akshamy.kz
– Bıyl bízdíń dostas halyqtarymyz óz tarıhyndaǵy mańyzdy beleske jettí. Qazaqstan Táuelsízdígíne – 30 jyl. Qytaı Kommunıstík partıyasynyń qūrylǵanyna – 100 jyl. Sondaı-aq, ekí aıdan keıín taǵy bír aıtuly oqıǵany atap ótemíz. Qazaqstan men Qytaı arasynda dıplomatıyalyq qatynastardyń ornaǵanyna 30 jyl tolady. Búgín bízdíń jan-jaqty árí máńgílík strategıyalyq seríktestígímíz kemeldeníp, jańa kezeńge qadam basty dep nyq senímmen aıta alamyn. Qarqyndy damyp kele jatqan Qytaı elí árdaıym Azıyadaǵy eń basty jáne senímdí seríktesímíz bolyp qala beredí, – dedí Qazaqstan Prezıdentí.
Memleket basshysy ózara tıímdí ekíjaqty yntymaqtastyq keń-baıtaq Eurazıya qūrlyǵynda bírlese damuǵa jáne órkendeuge jol ashyp otyrǵanyna, sauda-ekonomıkalyq qatynastar – yqpaldastyǵymyzdyń berík írgetasy ekeníne toqtalyp, aldaǵy kezeńde solaı bola beretínín atap óttí.
– Qıyndyqqa qaramastan, kúrdelí 2020 jyldyń ózínde ekíjaqty tauar aınalymy 5 paıyzǵa ósíp, 15 mıllıard dollardan asty. «Ózgeríster jelí soqqanda, bíreuler qabyrǵa tūrǵyzady, endí bíreuler jel dıírmen salady», – degen kóne qytaı naqyly bar. Pandemıyaǵa baılanysty Qazaqstan-Qytaı shekarasyna engízílgen uaqytsha shekteu sharalary tezírek ayaqtalyp, alys-berís qaıtadan jandana túsedí dep senemíz, – dedí Qasym-Jomart Toqaev.
Qazaqstan Prezıdentí qūttyqtau sózínde sauda-sattyq árdaıym órkendeudíń jáne halyqaralyq yntymaqtastyqtyń basty qozǵaushy kúshí sanalatynyn, būl qaǵıdat ǵasyrlar boıy Ūly Jíbek jolynyń boıynda ornalasqan bízdíń óńír úshín de asa mańyzdy ekenín aıtty.
– Osy ejelgí sauda joly Tóraǵa Sı Tszınpınníń «Beldeuler men joldar» atty auqymdy bastamasynyń arqasynda qaıta jańǵyrdy. Qazír jyl saıyn Qytaıdan Europaǵa Qazaqstan aumaǵy arqyly 500 myńnan astam konteıner tasymaldanady. Qūryq teńíz aılaǵy íske qosylǵannan keıín «Lyanyungan – Kars» tasymal dálízímen Qorǵastan Ystanbūlǵa júk jetkízu merzímí bes esege, yaǵnı 60 kúnnen 13 kúnge deıín qysqardy. Bíz Qorǵastan bólek, bírqatar kórshíles eldermen jańa shekaraaralyq hab qūryp jatyrmyz, – dep atap óttí Memleket basshysy.
Qasym-Jomart Toqaev búkíl álemdí sharpyǵan koronavırus índetí jahandyq sauda jelísíníń jūmysyna aıtarlyqtaı nūqsan keltírgeníne toqtaldy. Sondaı-aq Qazaqstan tūraqty tranzıttík tasymal baǵdaryn nyǵaıtyp, ony ártaraptandyryp, ınnovatsıyalyq logıstıkalyq ádís-tásílderdí engízu úshín barlyq múddelí tarappen tyǵyz jūmys júrgíze beretínín aıtty.
– Búgín esígín aıqara ashqan Qytaı halyqaralyq ımporttyq tauarlar kórmesí, shyn mánínde, dúnıejúzíníń ár túkpíríndegí eksportshylardy ūıystyratyn ortalyqqa aınaldy. Osy mańyzdy sharaǵa 120-dan astam memleketten tauar óndírushíler jınalyp otyr. Būl Shanhaı kórmesí Qytaıdaǵy alyp naryqqa kíretín «altyn qaqpa» ekenín aıqyn kórsettí. Osy kórmege Qazaqstannan 30 írí óním óndírushí qatysuda. Olar jalpy qūny 100 mıllıon dollardan asatyn azyq-túlík jáne auyl sharuashylyǵy ónímderín satuǵa kelísím shart jasaıdy dep josparlanyp otyr, – dedí Qazaqstan Prezıdentí.
Qazaqstan Prezıdentí sózín qorytyndylaı kele, Shanhaı kórmesíne qatysushylardyń jūmysyna tabys tílep, ózara tıímdí sauda baılanystary kókjıegíníń keńeıe beruíne nıettestík bíldírdí.