Keshtíń muzykalyq baǵdarlamasy Almatynyń tuǵan kúníne arnalǵan, dep habarlaıdy aqshamnews.kz tílshísí.
Robot-dırıjer Qūrmanǵazy atyndaǵy Qazaq ūlttyq halyq aspaptar orkestríníń 93-kontserttík mausymynyń ashyluyna qatysady. 11 qyrkúıekte Almatyda ótetín kontsert qala kúníne oraı ūıymdastyrylyp otyr. Keshtíń baǵdarlamasy men ūjymnyń jańa jobasy turaly orkestrdíń basshylyǵy men ónerpazdary Óńírlík kommunıkatsıyalar qyzmetínde bayandap berdí.
Keshtíń basty jańalyǵy — dástúrlí orkestr men qazírgí tehnologıyanyń bír sahnada toǵysqany bolyp otyr. Ūıymdastyrushylar robot-dırıjerdí sahnaǵa shyǵaru arqyly jas kórermenderdí ūlttyq muzykaǵa tartpaq oıda.
«Joba ūlttyq muzykalyq dástúr men zamandyq tehnologıyany bír sahnada toǵystyrudy kózdeıdí. Būl — qazaqtyń dástúrlí muzykasyn saqtaı otyryp, ony qazírgí kórkemdík jáne tehnologıyalyq sheshím arqyly jańa audıtorıyaǵa ūsynuǵa baǵyttalǵan úlken eksperıment», — deıdí Qūrmanǵazy atyndaǵy Qazaq ūlttyq halyq aspaptar orkestríníń bas dırıjerí Abylaı Tílepbergen.
Keshtíń muzykalyq baǵdarlamasy Almatynyń tuǵan kúníne arnalǵan. Kesh barysynda qalaǵa arnalǵan shyǵarmalar, qazaq kınosynyń tanymal saundtrekterí, klassıkalyq tuyndylar men kúı óneríníń jauharlary oryndalady. Kontsert DJ súıemeldeuímen jáne Almatynyń sımvolynyń bírí — aport almasyna arnalǵan kórmemen tolyǵa túspekshí.
Keshke Jūbanysh Jeksenūly, Batyrjan Myqtybaev, Ūljan Baıbosynova, Aıdos Jabaǵın men Ásel Raqymjan syndy tanymal ónerpazdar qatysady. Robot-dırıjermen qatar Abylaı Tílepbergen, Jeksen Aısyn men Naryn Qajyǵalı da sahnaǵa shyǵady. Kórkemdík jetekshísí - Batyrjan Myqtybaev.
Mausym boıy formatqa qatysty eksperıment jalǵasa beredí. Kórermenderge «Kurmangazy: next cover concert», «Sham jaryǵyndaǵy áuen», «QURMANǴAZY COMPOSER LAB» pen «Cinema hits» jobasyn ūsynady.
«Būl bízdíń 93 kontserttík mausymymyz. Qūrmanǵazy atyndaǵy Qazaq ūlttyq halyq aspaptar orkestrí 90 jyldan astam tarıhy bar úlken ūjym. Ol ūlttyq muzykalyq mūrany saqtap qana qoımaı, ony qazírgí mádenı keńístíkte nasıhattap júr», — dedí kontsert bólímí basshysy Sholpan Smaıylova.
Ūjym jūmysynyń negízgí baǵyty — ūlttyq muzykalyq mūrany saqtau. Orkestr repertuarynda Qūrmanǵazy, Táttímbet, Dáuletkereı, Dına men Seıtek shyǵarmalary erekshe oryn alady.
«Ūlttyq aspaptyq muzyka dástúrín jalǵastyryp, ony jańa formatta ūrpaqqa ūsynu orkestrdíń basty mıssıyasy», — dedí Sanjan Sabyrǵalıeva.
Mausymnyń ashylu kontsertí Qūrmanǵazy atyndaǵy orkestrdíń zalynda ótedí. Mekenjaıy: Abylaı han dańǵyly, 83. Bastaluy — saǵat 19:00-de.