Áleumettík jelíde Oreo táttísí qauíptí ekení turaly aqparat tarap jatyr. Onda būl táttí "arterıyany bítep tastauy" múmkín ekení, al kremí "plastıkalyq jelím" ekení aıtylady, - dep habarlaıdy aqshamnews.kz
Densaulyq saqtau mınıstrlígíníń Sanıtarıyalyq-epıdemıologıyalyq baqylau komıtetí málímetínshe, būl aqparat shyndyqqa janaspaıdy jáne ǵylymı tūrǵyda dáleldenbegen.
"Kondıterlík ónímder, sonyń íshínde pechene Eurazıyalyq ekonomıkalyq odaqqa múshe memleketter aumaǵynda tek keden odaǵynyń talaptaryna sáıkes kelgen jaǵdaıda ǵana aınalymǵa jíberíledí", - dep jazylǵan habarlamada.
Vedomstvo aqparatyna súıensek, 2025 jyly Oreo pechenesíníń úlgílerí zerttelgen.
"Zertteu nátıjesínde mıkrobıologıya jáne toksıkologıya kórsetkíshterí boıynsha tehnıkalyq reglamentter talaptaryna sáıkes kelmeıtín jaǵdaı anyqtalǵan joq. Zerttelgen barlyq úlgíníń tańbalanuy belgílengen talaptarǵa tolyq sáıkes keldí", - dep jazylǵan habarlamada.
Komıtet azamattardy qyraǵylyq tanytuǵa, kúmándí derekkózden alynǵan jalǵan aqparatqa senbeuge shaqyrdy.