Premer-mınıstr jylytu mausymy belgílengen merzímde bastaluy tıís ekenín qatań tapsyrdy, dep habarlaıdy aqshamnews.kz tílshísí.
Premer-mınıstr Oljas Bektenovtíń tóraǵalyǵymen ótken Úkímet otyrysynda aldaǵy jylytu mausymyna daıyndyq barysy qaraldy. Onda energetıka mınıstrí Erlan Aqkenjenov, ónerkásíp jáne qūrylys mınıstrí Ersaıyn Naǵaspaev, «KEGOC», «Samūryq-Energo» kompanıyalarynyń basshylary energıya kózderí men jylu jelíleríníń daıyndyǵy, kómírmen qamtamasyz etu, áleumettík sala, TKSh jáne ınjenerlík ınfraqūrylym nysandaryn daıyndau turaly bayandady. Abaı, Aqmola jáne Mańǵystau oblystarynyń ákímderí tyńdaldy.
Energetıka mınıstrlígíníń derekteríne sáıkes, aldaǵy jylytu mausymyna daıyndyq ayasynda elektr stansalarynda 3 energıya blogy, 33 qazandyq jáne 24 turbına jóndelude. Elektr energetıkasynda 15,6 myń shaqyrym elektr taratu jelílerín, būl josparlanǵan kólemníń 91%-y, sondaı-aq 372 qosalqy stansany, būl josparlanǵan kólemníń 84%-y, jóndeu ayaqtaldy. Jylu jelílerínde 246 shaqyrymdyq jóndeu jūmystary oryndaldy, būl – jospardyń 65%-y. Energıya kózderíníń otyn qoımalarynda 4,2 mln tonna kómír jáne 137 myń tonna mazut jınaqtalǵan, būl ótken jylǵy deńgeıden 2%-ǵa artyq. Ónerkásíp jáne qūrylys mınıstrlígíníń málímetínshe, búgíngí tańda bílím jáne densaulyq saqtau nysandarynyń 98%-y jáne tūrǵyn úılerdíń 95%-y jylytu mausymyna daıyn etíp qoıyldy. 1,8 myń shaqyrym sumen jabdyqtau jelíleríníń 1,3 myń shaqyrymy jáne 306 shaqyrym su būru jelíleríníń 225 shaqyrymy jóndeldí.
Premer-mınıstr atalǵan jūmystardy qarjylandyru edáuír ūlǵaıǵanyn eske sala otyryp, jóndeu nauqanyn uaqtyly ayaqtau qajettígíne nazar audardy.
«Memleket basshysy energetıka men kommunaldyq ınfraqūrylymnyń strategıyalyq mańyzyn, sondaı-aq elímízdíń energetıkalyq jáne ınfraqūrylymdyq negízín nyǵaıtu qajettígín árdaıym atap ótude. Atalǵan maqsattarǵa jyl saıyn auqymdy qarajat bólínedí. Bıyldyń ózínde energıya nysandaryn jóndeuge jáne jańǵyrtuǵa 851 mlrd teńge kózdelgen. Būl ótken jylmen salystyrǵanda 60%-ǵa artyq. Onyń íshínde «Tarıftí ınvestıtsıyaǵa aıyrbastau» baǵdarlamasy ayasynda bıyl shamamen 384 mlrd teńge bólíndí. Būl 2025 jylǵy jóndeu nauqany ayasynda bólíngen qarajattan 15%-ǵa kóp. Osyndaı kólemdegí qarjylandyru jaǵdaıynda jóndeu merzímderín auystyruǵa, jūmys qarqynyn báseńdetuge jáne bólíngen qarajattyń ıgerílmeuíne jol beruge bolmaıdy», — dep atap óttí Oljas Bektenov.
Otyrys barysynda óńírlerdegí jylytu mausymyna daıyndyqqa nazar audaryldy. Premer-mınıstr onyń bastaluyna bír aıǵa juyq uaqyt qalǵanyn, būl rette soltústík óńírlerde daıyndyq jūmystaryn ayaqtau kezeńí anaǵūrlym shekteulí ekenín atap óttí. Osyǵan baılanysty jóndeu nauqanyn jedeldetu jáne óńírlerdegí jūmystardyń uaqtyly ayaqtaluyn qamtamasyz etu tapsyryldy.
Premer-mınıstr energetıka nysandaryn qysqa daıyndauǵa jauapty óńírlík shtabtardyń jūmysyn kúsheıtu qajettígíne óz aldyna bólek nazar audardy. Ákímdíkterge oryndalatyn jūmystardyń barysyn baqylaudy kúsheıtu jáne naqty basqarushylyq sheshímder qabyldau tapsyryldy. Energetıka mınıstrlígíne jóndeu merzímderín ūzartudyń árbír faktísí boıynsha ákímshílík sharalar qabyldau jáne jóndeu nauqanynyń būzyluyna nemese keshíktíríluíne jol beretín basshylardyń ís-áreketteríne túbegeılí baǵa beru tapsyryldy.
Qazír energıya kásíporyndarynyń jylytu mausymyna ázírlík pasporttaryn alu jūmystary bastaldy. Ákímder energıya nysandarynyń qys mezgílíne daıyndyǵyn baǵalau jóníndegí komıssıyalardyń jūmysyna tíkeleı qatysuy, energıya kózderíníń, jylu jáne elektr jelíleríníń jaı-kúıín tūraqty negízde tekseríp, jóndeu jūmystarynyń barysy men qajettí materıaldyq resurstardyń boluyn baqylauda ūstauy qajet. Ázírlík pasportyn almaı tūryp, jylytu mausymyn bastap ketetín bolsa, tıístí basshylar jauapkershílíkke tartylady.
Jalpy Energetıka mınıstrlígíne óńír ákímdíkterímen bírlesíp, jylu kózderí men jylu jelílerínde jóndeu jūmystarynyń uaqtyly ayaqtaluyn qamtamasyz etuí kerek. Samūryq-Energo jóndeu jūmystarynyń merzímínde ayaqtaluyn ǵana emes, jańa quattardy íske qosudy da qamtamasyz etuí qajet. Al KEGOC kompanıyasy jelíler men qosalqy stansalardy jóndeudíń bekítílgen kestesín oryndauǵa tıís.
Premer-mınıstr jylytu mausymy belgílengen merzímde bastaluy tıís ekenín atap ótíp, osyǵan baılanysty jauapty mınıstrlíkter men memlekettík organdarǵa bírqatar tapsyrma berdí:
Bírínshí. Energetıka mınıstrlígí óńír ákímdíkterímen bírlesíp, osy jyldyń 1 qyrkúıegíne deıín óńírlerge áleumettík mazut jetkízu kestesín bekítu tapsyryldy. Qazaqstan temír joly kompanıyasymen bírge bekítílgen kestege jáne kólemderge sáıkes energıya nysandaryna kómír men mazutty uaqtyly jetkízu boıynsha sharalar qabyldau qajet.
«Halyqty jáne kommunaldyq-tūrmystyq sektordy kómírmen uaqtyly qamtamasyz etu máselesíne arnaıy toqtalǵym keledí. Kómírdí óndíru men tasymaldaudan bastap ony halyqqa satuǵa deıíngí búkíl jetkízu tízbegíne qatań baqylau ornatu qajet. Óńírlerde kómír tapshylyǵy men baǵanyń negízsíz ósuíne jol berílmesín. Būl úderíske qatysushylardyń barlyǵy óz jūmysyn kómírmen qamtamasyz etuge arnalǵan qoldanystaǵy tsıfrlyq platforma ayasynda ūıymdastyruǵa tıís», — dep atap óttí Oljas Bektenov.
Ekínshí. Artta qalǵan ákímdíkterge oryn alǵan máselelerdí tez arada joyu qajet. Jylu beru mausymyn kestege sáıkes bastau kerek, sonymen qatar aua-raıynyń ózgeruí men kúnníń suytuyna qatysty uaqtyly áreket etu kerek.
Úshínshí. Ónerkásíp jáne qūrylys mınıstrlígí, óńír ákímdíkterí 1 qyrkúıekke deıín bílím beru jáne densaulyq saqtau nysandarynyń tolyq daıyndyǵyn qamtamasyz etsín. Oqu-aǵartu, Ǵylym jáne Densaulyq saqtau mınıstrlíkterí de būl máselení baqylauǵa alsyn.
Soltústík, ortalyq jáne shyǵys óńírler boıynsha barlyq ınjenerlík ınfraqūrylym men tūrǵyn úı-kommunaldyq sharuashylyq nysandary 15 qyrkúıekke deıín, al qalǵan óńírler 15 qazanǵa deıín jyludy íske qosuǵa tolyq daıyn boluǵa tıís
«Meníń tapsyrmam boıynsha Premer-mınıstrdíń bírínshí orynbasary barlyq óńírlerdí aralap, onyń íshínde jylytu mausymyna daıyndyq barysyn da tekseríp keldí. Nūrlybek Mashbekūly, būl máselení qatań baqylauda ūstap, ár apta saıyn óńírlerdegí jaǵdaı turaly maǵan bayandap tūryńyz», — dep atap óttí Premer-mınıstr.