Almatyda bıylǵy kúz qalypty ótedí dep boljap otyr sınoptıkter, dep habarlaıdy aqshamnews.kz tílshísí.
Ūzaqqa sozylatyn aptap ystyq pen qatty suyq ta bola qoımaıdy. Degenmen kún raıy kúzdegídeı qūbylmaly bolyp, jyly kúnnen keıín ayaq asty kún suytyp, qyrkúıektíń sońynda-aq shyq túsíp, úsík shaluy da ábden múmkín. Bíraq kún qazan–qarasha aıynda ǵana suyta bastaıdy. Óńírlík kommunıkatsıyalar qyzmetínde «Qazgıdromet» RMK-nyń Almaty men oblys boıynsha bólímshesíníń meteorologıyalyq boljam bólímíníń basshysy Dáulet Kısebaev aldaǵy kúzde qaladaǵy aua raıynyń qandaı bolaryn aıtyp berdí.
Aldyn ala jasalǵan boljam boıynsha Almatyda qyrkúıek aıy klımattyq normaǵa jaqyn bolady. Aıdyń ortasha temperaturasy shamamen +17,5 °C bolady, norma +18 °C. Qazanda ortasha temperatura da qalypty deńgeıde – shamamen +10,6 °C, qarashada +2,9 °C bolady dep boljap otyr mamandar.
Sonymen bírge kúzde temperatura da bírqalypty bolmaıdy. Ásírese qazan aıy jaqyndaǵanda kún jyldam suytady. Qyrkúıekte keı kúnderí kúndízgí jáne túngí temperaturanyń aıyrmashylyǵy 10–15 gradusqa jetuí yqtımal.
«Kúz – ótpelí mausym, sondyqtan Almaty úshín temperaturanyń aıtarlyqtaı auytquy qalypty jaǵdaı. Kúndíz álí de jyly boluy múmkín, bíraq tańerteń jáne keshke taman jylyraq kıínu kerek. Qazírgí uaqytta ūzaqqa sozylatyn anomaldy ystyq nemese búkíl mausymǵa sozylatyn kúrt árí ūzaq suytu bolady deuge negíz joq», – deıdí Dáulet Kısebaev.
Jauyn-shashyn mólsherí boıynsha da kúz klımattyq normaǵa jaqyn bolady dep boljap otyr. Qyrkúıekte shamamen 28 mm, qazanda 50 mm, qarashada 55 mm jauyn-shashyn túsedí. Alaıda būl jańbyrdyń az mólsherde jáne tūraqty túrde jauatynyn bíldírmeıdí: qūrǵaq kezeńder bírneshe kúnge sozylatyn jańbyrly nemese qarqyndy jauyn-shashyn kezeńímen almasuy múmkín.
Almatyda qyrkúıektíń úshínshí onkúndígínde shyq túsíp, úsík shaluy múmkín. Ásírese tau bókteríndegí audandarda. Sonymen qatar túngí aua temperaturasy álí de oń bolyp, +1…+6 °C shamasynda saqtaluy yqtımal. Tauly aımaqtarda suyq erterek túsedí: mūnda −6 °C-qa deıín úsík boluy múmkín, al qyrkúıektíń ekínshí onkúndígíníń sońynda jańbyrdyń suly qarǵa ūlasuy ábden múmkín.
Al alǵashqy qardyń Almatynyń ózínde naqty qashan jauatynyn sınoptıkter ázírge boljap otyrǵan joq. Kúzde suly qar jauǵan kúnníń ózínde, būl qar basyp, qys tústí degendí bíldírmeıdí deıdí.
«Mausymdyq boljam alǵashqy qardyń nemese qatty suytudyń naqty kúnín kórsete almaıdy. Ol mausymnyń jalpy sıpatyn kórsetedí, al naqty aua raıy kún jaqyndaǵan saıyn anyǵyraq bolady. Sondyqtan tūrǵyndar úshín eń mańyzdysy — aldaǵy bír–úsh kúnge arnalǵan boljamdar. Qauíptí aua raıy qaupí tuyndaǵan jaǵdaıda “Qazgıdromet” eskertu jasaıdy», – dedí spıker.
Almatylyqtardyń dástúrlí «ábíger jazyn» — «babe letony» kóru múmkíndígí de bar. Kúz barysynda jyly, qūrǵaq árí shuaqty aua raıy ornaıtyn jekelegen kezeńder boluy múmkín. Alaıda olardyń naqty qashan bastalyp, qansha uaqytqa sozylaryn aldyn ala anyqtau ázírge múmkín emes.
Sınoptıkter júrgízushílerge qar túskenín kútpeı, qyrkúıektíń sońynan bastap kólígín qysqa qamdaı beruge shaqyryp otyr. Qazan aıyna deıín akkumulyatordy, jylytu júıesín, tejegísh júıesín, áınek tazalaǵyshty tekseríp, áınek juǵysh sūıyqtyqty terís temperaturaǵa jaramdy sūıyqtyqqa auystyrǵan jón. Ásírese táulíktík ortasha temperatura shamamen +5…+7 °C-qa deıín tómendeıtín kúnderge nazar audaru qajet.
«Qar túskennen keıín arty kóktaıǵaqqa ūlasady kóbíne. Ásírese kópírde, estakadada, kóleńkelí jol uchaskesí men tau bókterínde qauíptírek. Sondyqtan kólíktí aldyn ala qamdaǵan dūrys», – deıdí Dáulet Kısebaev.
Aldaǵy qysqa qatysty aıtar bolsaq, kúzgí boljamǵa qarap onyń qarly bolaryn ázírge kesíp-píshíp aıtu múmkín emes. Qysta jauatyn qardyń mólsherí atmosferalyq tsırkulyatsıyaǵa, temperatura men jauyn-shashynnyń qalaı bolaryna baılanysty. Naqtyraq málímet qys aılaryna arnalǵan jeke mausymdyq boljam shyqqannan keıín belgílí bolyp qalady.
«Qazgıdromet» mamandary jahandyq klımatpen bírge Qazaqstandaǵy ortasha temperatura da bírtíndep ósíp kele jatqanyn aıtady. Bíraq būl kelesí kúz Almatyda míndettí túrde aldyńǵysynan jylyraq bolady degen sóz emes: suyq kezeńder, kúrt salqyndau men aua raıynyń basqa da qūbylmaly sıpattary álí de boluy múmkín.