Bıyl qazaq halqynyń kórnektí aǵartushysy, qoǵam qaıratkerí, jazushy jáne aqyn Mírjaqyp Dulatovtyń tuǵanyna 140 jyl tolyp otyr. Ol – HH ǵasyrdyń basynda ūlt táuelsízdígí men bostandyǵy jolynda kúresken Alash qozǵalysynyń kórnektí ókílí, qazaqtyń ūltjandy ūly. Óz halqynyń bolashaǵy úshín ómírín arnaǵan Mírjaqyp Dulatov 1885 jyly qazírgí Qostanaı oblysy Jangeldın audanyna qarasty Saryqopa óńírínde dúnıege kelgen. Jastaıynan bílímge qūshtar bolyp, Torǵaıdaǵy orys-qazaq mektebínde oqydy. Keıín ūstazdyq qyzmet atqaryp, el íshíndegí oqu-aǵartu ísíne belsene aralasty.
Onyń shyǵarmashylyǵy qazaq qoǵamyn oyatuǵa, eldík pen erkíndík ıdeyasyn nasıhattauǵa arnaldy. 1909 jyly jaryq kórgen «Oyan, qazaq!» atty kítaby – halyq sanasyn sílkíndíríp, ūlt namysyn janyp, azattyq ruhyn oyatqan bíregeı tuyndy boldy. Būl eńbek sol dáuírde tyıym salynyp, avtor qudalauǵa ūshyraǵanymen, qazaq ruhanıyatynyń altyn qoryna endí.
Mírjaqyp Dulatov – «Qazaq» gazetíníń belsendí avtorlarynyń bírí. Ol Ahmet Baıtūrsynūly jáne Álıhan Bókeıhan syndy ūlt kósemderímen bírge Alash ıdeyasynyń órkendeuíne ólsheusíz úles qosty. Sonymen qatar, qazaq ádebıetínde tūńǵysh roman jazǵan qalamger retínde tarıhta qaldy. Onyń «Baqytsyz Jamal» romany ūlttyq prozanyń bastauy sanalady.
Ómíríníń sońynda Mírjaqyp Dulatov keńestík quǵyn-súrgínge ūshyrap, 1935 jyly aıdauda qaza tapty. Alaıda onyń esímí men eńbegí táuelsíz Qazaqstan dáuírínde qaıta jańǵyryp, ūlttyń ūly perzentí retínde máńgílík qūrmetke ıe boldy.
Búgínde elímízdíń barlyq óńírínde Mírjaqyp Dulatovtyń 140 jyldyǵyna oraı ǵylymı konferentsıyalar, ádebı keshter, kórmeler men eske alu sharalary ótkízílíp jatyr. Būl – ūlt tarıhyndaǵy ūly tūlǵalardyń ónegesín dárípteu men ótkendí ūmytpauǵa degen qūrmettíń kórínísí.
Solardyń bírí – Almaty qalasyndaǵy Oqushylar saraıynda ótken respublıkalyq píkírsaıys turnırí. Būl sharaǵa elímízdíń túkpír-túkpírínen kelgen úzdík oqushylar men debatshylar qatysty. Ís-sharany Qazaqstan Respublıkasy Oqu-aǵartu mınıstrlígíníń qoldauymen Respublıkalyq qosymsha bílím beru oqu-ádístemelík ortalyǵy ūıymdastyrdy.
Turnırdíń basty maqsaty – ūly tūlǵanyń ómírí men shyǵarmashylyǵyn jas ūrpaqqa tanystyru, oqushylardyń oı-órísín keńeıtu, sheshendík qabíletín jáne synı tūrǵydan oılau daǵdylaryn damytu boldy.
Qatysushylar qoǵamdaǵy ózektí máseleler boıynsha píkír almasyp, dálel men derekke súıene otyryp, óz oılaryn erkín jetkízdí. Píkírsaıys barysynda jastar Mírjaqyp Dulatovtyń aǵartushylyq ıdeyalaryn, ūlt bírlígí men bílímníń mańyzyn talqylap, onyń el damuyna qosqan úlesín erekshe atap óttí.
Jarys qorytyndysynda úzdík komanda men sheshender arnaıy dıplomdarmen jáne estelík syılyqtarmen marapattaldy. Ūıymdastyrushylardyń aıtuynsha, būl turnır aldaǵy uaqytta da dástúrlí túrde jalǵasyn tabady.
Osyndaı ís-sharalar jas buynnyń ruhanı damuyna, tarıhı tūlǵalardy tanuǵa jáne eljandylyq sezímín arttyruǵa zor yqpal etedí. Mūndaı ruhanı kezdesuler aqyn mūrasyn jańǵyrtyp qana qoımaı, óskeleń ūrpaqqa ónege bolary sózsíz.
