Nıkos Hrıstodulıdıs Astanaǵa sapary ekíjaqty qarym-qatynasty damytudyń mańyzdy kezeńí sanalatynyn jetkízdí, – dep habarlaıdy aqshamnews.kz tílshísí.
–Bíz Ortalyq Azıya men Qazaqstannyń álemde geosayası tūrǵydan mańyzdy ról atqaratynyn bílemíz. Qazaqstan Europa Odaǵynyń strategıyalyq seríktesí sanalady. Kıpr – Europa Odaǵyna múshe memleket retínde qazaqstandyq ınvestorlar men kompanıyalar úshín europalyq naryqqa shyǵatyn senímdí qaqpa. Bíz Europa Odaǵy standarttaryna tolyǵymen saı keletín naqty ískerlík ortany ūsynamyz. Aqparattyq-kommunıkatsıyalyq tehnologıyalar, fınteh, ınvestıtsıyalyq qorlar, keme qatynasy, turızm, bílím beru, jańartylatyn energıya jáne ınfraqūrylym ekíjaqty yntymaqtastyqtyń negízgí baǵyttaryna aınala alady. Búgín «Astana» halyqaralyq qarjy ortalyǵyna barudy josparlap otyrmyn. Atalǵan ortalyqpen áríptestíktí, ásírese qarjy qyzmetterí men «jasyl» qarjylandyru salalaryndaǵy yntymaqtastyqty keńeıtude zor áleuet bar, – dedí Kıpr Prezıdentí.
Memleket basshysy nátıjelí ekonomıkalyq kún tártíbíne qol jetkízu úshín úkímetter kúshín úılestíru mańyzdy dep sanaıdy.
Osy oraıda Qasym-Jomart Toqaev Ekonomıkalyq yntymaqtastyqtyń 2028 jylǵa deıíngí jol kartasyn ázírleudí ūsyndy. Prezıdent Ekonomıkalyq yntymaqtastyq jóníndegí úkímetaralyq komıssıya men Ískerlík keńes qūru, sondaı-aq sauda delegatsıyalarymen tūraqty almasu jónínde bastama kóterdí.
Taraptar sauda, ınvestıtsıya, kólík-logıstıka, tsıfrlyq kommunıkatsıya, jasandy ıntellekt jáne qarjy salalaryndaǵy yqpaldastyqty nyǵaıtu perspektıvasyn talqylady.
Sonymen qatar mádenıet, bílím, sport jáne turızm baǵyttaryndaǵy baılanysty keńeıtu múmkíndígíne nazar audardy.