Kóktemníń shuaqty kúnderímen bírge jetetín Nauryz meıramy – tabıǵattyń ǵana emes, adam janynyń da jańaruyn bíldíretín erekshe kezeń. Būl – ótkenge taǵzym etíp, bolashaqqa úmítpen qarauǵa úndeıtín, ūlttyq qūndylyqtardy ūlyqtaıtyn ūly mereke. Jyl saıyn Nauryz tek dástúrlí dastarhan men salt-joralǵylar arqyly emes, mádenı-ruhanı ís-sharalar arqyly da keń kólemde atalyp ótíp júr.
Ásírese Almaty qalasynda būl mereke erekshe mazmūnmen tolyǵa túsedí. Eldíń mádenı astanasy sanalatyn megapolıste teatrlar, kontsert zaldary men shyǵarmashylyq ūjymdar Nauryzdy tyń ıdeyalarmen qarsy alyp, kórermenge tosyn syılar ūsynudy dástúrge aınaldyrǵan. Bıyl da qala teatrlary sahnalyq qoıylymdarmen ǵana shektelmeı, ónerdí ashyq keńístíkke shyǵaryp, tūrǵyndardy merekelík atmosferaǵa tíkeleı tartatyn erekshe jobalardy qolǵa aldy. Būl bastamalar teatr óneríníń zamanauı formatta damyp, qoǵammen etene jaqyndaı túskenín kórsetedí.
Nauryznama onkúndígíníń úshínshí kúní — Mádenıet jáne ūlttyq salt-dástúr kúníne oraı Almatyny bı dumany kernedí. Megapolıstegí jetekshí teatrlardyń artısterí kóktemníń jańaruyn aıshyqtaıtyn merekemen qala tūrǵyndaryn qūttyqtau úshín auqymdy fleshmobqa bíríktí. Būl bastama teatr óneríníń tek sahnamen shektelmeıtínín, onyń qoǵammen etene baılanysta ekenín taǵy bír márte dáleldedí.
Būl úlken sharanyń bastamashysy — Natalıya Sats atyndaǵy Memlekettík akademıyalyq orys balalar men jasóspírímder teatry. Ís-shara Qazaqstan Respublıkasy Mádenıet jáne aqparat mınıstrlígí men Almaty qalasy ákímdígí qoldauymen júzege asty. Aıta keterlík jaıt, atalǵan teatr ǵımaratynda qazírgí uaqytta auqymdy qaıta jańǵyrtu jūmystary júrgízílude, būl onyń bolashaqta jańa deńgeıde kórermen qabyldauyna jol ashady.
Jarqyn fleshmobqa qaladaǵy bírqatar jetekshí teatr ūjymdary qatysty. Atap aıtqanda, Ǵ. Músírepov atyndaǵy Qazaq memlekettík akademıyalyq balalar men jasóspírímder teatry, M. Lermontov atyndaǵy Memlekettík akademıyalyq orys drama teatry, Q. Qojamıyarov atyndaǵy Respublıkalyq memlekettík akademıyalyq ūıǵyr muzykalyq komedıya teatry, Respublıkalyq memlekettík akademıyalyq koreı muzykalyq komedıya teatry jáne Respublıkalyq akademıyalyq nemís drama teatry bír alańda bas qosty. Túrlí shyǵarmashylyq mektepter men mádenı dástúrler toǵysqan būl bastama Almatynyń kópetnosty mádenı kelbetín aıqyn kórsettí.
Fleshmobtyń sharyqtau shegí — ūlttyq naqyshtaǵy «Qara jorǵa» bıí boldy. Būl bı shekara ataulyny ūmyttyryp, búkíl qalany bírtūtas sahnaǵa aınaldyrdy. Ol dostyqtyń, ata-baba mūrasyna degen qūrmettíń jáne mádenı bírlíktíń sımvolyna aınalyp, kórermen kóńílínen shyqty.
Bír erekshelígí, būl jobaǵa kásíbı bıshíler emes, drama teatrlarynyń akterlerí qatysty. Olar nebárí bír aptanyń íshínde bı qımyldaryn meńgeríp, árbír qozǵalysqa akterlík sheberlík pen ūlttyq ruhty síńíre bíldí. Al horeografıyalyq sheshímderdí «Saltanat» memlekettík bı ansamblí ázírlep, jobanyń kásíbı deńgeıín arttyrdy.
Sonymen qatar, aqparattyq qoldau kórsetken Almaty TV teleradıokompanıyasy būl bastamanyń keń audıtorıyaǵa jetuíne yqpal ettí. Arna túsírílím jūmystaryn ūıymdastyryp qana qoımaı, merekelík kóńíl kúıdí ekran arqyly mıllıondaǵan kórermenge jetkízdí.
Jalpy, Nauryz merekesí qarsańynda Almaty teatrlarynyń belsendílígí erekshe baıqalady. Būl rette, óner ordalary ūlttyq qūndylyqtardy dárípteıtín qoıylymdardy sahnalap, kórermenge tereń mazmūndy tuyndylar ūsynuda. Teatrlardaǵy merekelík baǵdarlamalar men osyndaı ashyq formattaǵy jobalar mádenıet pen qoǵam arasyndaǵy baılanysty nyǵaıta túsude.
Almaty teatrlarynyń Nauryzǵa tartuy – tek sahnalyq qoıylymdarmen shektelmeıtín, keń auqymdy mádenı qūbylys. Teatr ártísteríníń qala kósheleríne shyǵyp, halyqpen bírge merekeleuí – ónerdíń ómírmen bíte qaınasqanyn kórsetedí. Mūndaı bastamalar ūlttyq ruhty jańǵyrtyp qana qoımaı, qala tūrǵyndaryn ortaq qūndylyqtar tóńíregínde bíríktíre túsedí.
Roza RAQYMQYZY