Almaty qalasynyń Bílím basqarmasy memlekettík bílím beru ūıymdaryndaǵy bos basshylyq lauazymdarǵa úmítkerlerdí konkurstyq íríkteudí jańa, ashyq formatta ótkízdí, – dep habarlaıdy aqshamnews.kz tílshísí.
Íríkteu protsesí qala tarıhynda bírínshí ret tíkeleı efırde kórsetílíp, kez kelgen adamǵa konkurstyq komıssıya otyrysyn naqty uaqyt rejımínde baqylauǵa múmkíndík aldy.
12 nauryz kúní ótken komıssıya otyrysy Bílím basqarmasynyń Instagram-daǵy resmı paraqshasy arqyly kórsetíldí. Bastama bílím beru salasyndaǵy memlekettík basqaru baǵytyndaǵy ashyqtyq qaǵıdattaryn qamtamasyz etu jolyndaǵy mańyzdy qadam boldy.
Konkurstyq komıssıya qūramyna memlekettík organdar ókílderí, qoǵam qaıratkerlerí, sonymen qatar pedagogıka jáne bílím beru menedjmentí salasyndaǵy táuelsíz sarapshylar kírdí. Ashyq sūhbat barysynda úmítkerler bílím beru ūıymdaryn damytuǵa qatysty óz kózqarastaryn ūsynyp, basqarushylyq jáne kásíbı qūzyretterí boıynsha baǵalandy.
Íríkteudíń jańa formaty rásímníń ashyqtyǵyn qamtamasyz etíp, sheshímdí jabyq túrde qabyldau múmkíndígíne jol bermeuge baǵyttaldy. Tíkeleı efır kásíbı qauymdastyq pen jalpy jūrtshylyq tarapynan qyzyǵushylyq tudyryp, bílím beru júıesíndegí basqarushylyq kadrlyq rezerv qalaı qalyptasatynyn baqylauǵa jol ashty.