Nyu-Iorktíń jańa merí - 34 jastaǵy Zohran Mamdanı. Ol turaly ne belgílí jáne ol jeńíske qalaı jettí? Tolyǵyraq Aqshamnews.kz materıalynda.
Ol - mūsylman, Ugandada tuǵan, sotsıalıst, Palestınanyń táuelsízdígín qoldaıdy. Bolashaq mer qyzmetíne 2026 jylǵy 1 qańtarda kírísedí.
Mamdanı jazda-aq Demokratıyalyq partıyanyń praımerızínde jeńíp, Nyu-Iork shtatynyń būrynǵy gubernatory, tájírıbelí sayasatker Endryu Kuomony artta qaldyryp, nauqannyń favorıtíne aınaldy.
Bıyldyń basynda Mamdanı tek 1 paıyz tanymal edí. Típtí óz shtaby onyń jeńu múmkíndígín 3% dep baǵalaǵan.
Onyń aıyrmashylyǵy qandaı?
New York Times málímetínshe, ol - keıíngí júz jyldan asa uaqyt íshíndegí eń jas, qalanyń tarıhyndaǵy alǵashqy ońtústík azıyalyq, alǵashqy mūsylman mer.
Respublıkashyldar Mamdanıdí "kommunıst" árí "jıhadıst" dep atady. AQSh prezıdentí Donald Tramp, mıllıarder Ilon Mask jáne basqa da joǵary lauazymdy respublıkashyldar ony qoldamauǵa shaqyrdy.
"Dostar, bíz sayası áulettí taqtan túsírdík. Bíz kópshílíkten terís aınalyp, tańdaulylardyń degeníne ǵana bas ıgen sayasattyń betín jabamyz", - dedí Mamdanı jeńís sózínde.
Demokrattar úshín "radıkal"
Shíldede Dempartıya atynan resmı túrde ūsynylǵan soń, bír top bıznesmen men sayasatker Nyu-Iork mery Erık Adamspen kezdesíp, Mamdanıdíń megapolıs basshysy boluyna jol bermeudí talqylaǵan.
Axios málímetínshe, Mamdanıdíń sotsıalıstík ūstanymy men Palestınanyń táuelsízdígín ashyq qoldauy demokratıyatardy shoshytty.
© AP Photo / Heather Khalifa
Mer qandaı uáde berdí?
- Ol subsıdıyalanatyn tūrǵyn úıdíń jaldau aqysyn ósírmeudí,
- balabaqsha baǵasyn túsírudí, avtobustardy tegín etudí,
- arzan azyq-túlík dúkenderíníń jelísín qūrudy uáde ettí.
- Jylyna 1 mıllıon dollardan kóp tabatyn adamdar men bızneske qosymsha salyq saludy ūsyndy.
Osy ūsynystary úshín opponentterí ony qalany qūrtatyn "kommunıst-radıkal" dep atady. Sondaı-aq, Gazadaǵy jaǵdaıdy "genotsıd" dep ataǵany úshín ony antısemıtızmde aıyptady.
Axios-tyń aıtuynsha, praımerızden keıín Mamdanı rıtorıkasyn sál jūmsartty. Bıznes ókílderímen kezdesíp, bolashaq qala bılígímen "seríktes boluy" múmkín ekenín aıtty.
2020 jylǵy Black Lives Matter narazylyqtarynan keıín polıtsıya qarjysyn qysqartudy qoldaǵan Mamdanı qazír "Qoǵamdyq qauípsízdík departamentín" qūrudy ūsynyp, qalalyq polıtsıya basshysyn almastyrmauǵa kelísím berdí.
Donald Tramp nege oǵan dauys bermedí?
4 qarashadaǵy saılauda ol 50,5% dauys jınady, al basty qarsylasy - būrynǵy gubernator Endryu Kuomo - 41,7% aldy.
Saılauǵa sanauly kún qalǵanda Donald Tramp Kuomoǵa dauys beruge shaqyrdy. AQSh prezıdentí Zohran Mamdanı mer bolsa, Nyu-Iork qarjysyn qysqartamyn dep bírneshe ret qoqan-loqy jasap, "saılaushylardyń tańdauy joq - Kuomoǵa dauys beruge míndettí" dedí.
Mamdanı turaly ne belgílí?
Zohran Mamdanı 1991 jylǵy 18 qazanda Uganda astanasy Kampalada tuǵan. Jetí jasynda otbasy Nyu-Iorkke qonys audarǵan. Onyń anasy - rejısser, ákesí - Kolumbıya unıversıtetíníń antropologıya professory (ekeuí de Úndístanda tuǵan).
Mamdanı Bronkstyń Ǵylymı joǵary mektebín bítírgen, sol jerde mekteptegí alǵashqy krıket komandasyn qūrdy. 2014 jyly Men shtatyndaǵy Boudoın kolledjín támamdap, afrıkanıstıka mamandyǵy boıynsha bakalavr dárejesín aldy. Kolledjde oqyp júríp "Palestına úshín ádíldík studentterí" ūıymynyń bólímshesín qūrushylardyń bírí boldy. 2018 jyly AQSh azamattyǵyn alǵan.
Sayasatqa keluíne qūqyqtyq keńesshí retíndegí jūmysy túrtkí boldy: ol Kvıns tūrǵyndary arasyndaǵy tūrmysy tómen azamattarǵa baspanasynan aırylmauǵa kómektestí. Sonymen qatar, bolashaq sayasatker rep oryndap, aldymen Young Cardamom, keıín Mr. Cardamom laqap attaryn qoldandy. 2017 jyly Nyu-Iorktegí mūsylmannyń ómírí turaly "Salaam" tregín jazdy.
Vıdeo kadry
2020 jyly Mamdanı Nyu-Iork shtaty Assambleyasyna saılandy. Osy qyzmette ol bír jyl boıy bes baǵytta qalalyq avtobustardy tegín qylǵan pılottyq jobany íske qosty.
2025 jyly ol sırıya-amerıkalyq suretshí Rama Duvadjıge úılendí. Jūp Kvınste tūrady.
AP Photo/Yukı Ivamura
