Memorgandar men ÚEŪ Azamattyq jáne sayası qūqyqtar jóníndegí halyqaralyq pakt boıynsha Qazaqstan bayandamalaryn talqylady
Qazaqstannyń Syrtqy íster mınıstrlígínde Erekshe tapsyrmalar jóníndegí elshí Úsen Súleımenníń tóraǵalyǵymen «Adamı ólshem jóníndegí dıalog alańy» konsultatıvtík-keńesshí organynyń («AÓDA» KKO) kezektí onlaın-otyrysy óttí.
Ís-sharaǵa qazaqstandyq adam qūqyqtaryn qorǵau salasyndaǵy úkímettík emes ūıymdary, Parlament deputattary, Prezıdent janyndaǵy Adam qūqyqtary jóníndegí komıssıya hatshysy, QR Adam qūqyqtary jáne bala qūqyqtary jóníndegí uákílderí, Joǵarǵy sot, Konstıtutsıyalyq Keńes, múddelí mınıstrlíkterdíń, sondaı-aq halyqaralyq seríktester – BŪŪ Damu baǵdarlamasy, Adam qūqyqtary jóníndegí Joǵarǵy komıssar basqarmasy, EQYŪ, Europa odaǵy, AQSh-tyń jáne Kanadanyń elshílíkterí, YuSAID jáne «Halyqaralyq túrme reformasy» ÚEŪ ókílderí qatysty.
Otyrysty ashqan Úsen Súleımen 2021 jylǵy 9 mausymda Prezıdent Qasym-Jomart Toqaevtyń «Qazaqstan Respublıkasynyń adam qūqyqtary salasyndaǵy odan árí sharalary turaly» Jarlyqqa qol qoyuynyń jáne Adam qūqyqtary salasyndaǵy bírínshí kezektegí sharalar josparyn íske asyrudyń mańyzdylyǵyn atap óttí.
«Jarlyq pen Jospar táuelsízdík alǵan sátten bastap eldegí júıelí jūmystyń qorytyndysy boldy. Alaıda, Qazaqstannyń odan árí ekonomıkalyq ósuí ekonomıkamyzdyń óńírlík jáne álemdík ólshemderdegí básekege qabílettílígíne tíkeleı baılanysty – jáne būl jerde adam qūqyqtarynyń damyǵan júıesí bolmaı ís alǵa baspaıdy», - dedí Úsen Súleımen.
Osyǵan baılanysty Memleket basshysy adam qūqyqtaryn qorǵaudyń ūlttyq tetíkterín jetíldírudíń el úshín asa mańyzdy toǵyz baǵytyn aıqyndady.
«Memleket basshysy bastaǵan jūmystyń tabysty boluynyń kóptegen faktorlaryn atauǵa bolady. Bíraq negízgí árí sheshushí faktor – el azamattarynyń qūqyqtaryn qorǵau salasynda saǵat saıyn «mıkro» deńgeıde jūmys ísteıtín azamattyq qoǵamymyzdaǵy seríktesterdíń belsendílígí. Osy praktıkter ǵana Qazaqstannyń qūqyq qorǵau júıesíníń barlyq álsíz tūstaryn kóru arqyly olardy Qazaqstannyń qajettílíkterí men míndetteríne sáıkes keltíruge jáne teńestíruge kómektese alady» - dep atap kórsettí Úsen Súleımen.
Osy oraıda memlekettík organdar men úkímettík emes sektor arasyndaǵy syndarly dıalogty jalǵastyrudyń mańyzdylyǵyn atap óttí.
Otyrysqa qatysushylar ómír súru, jeke basqa qol sūqpaushylyq qūqyqtary, azaptaudan bostandyq, sóz jáne óz píkírín bíldíru bostandyǵy, bírlesu jáne beıbít jınalystar ótkízu bostandyǵy, dín jáne sením bostandyǵy, erkín júríp-tūru bostandyǵy jáne mıgranttardyń, bosqyndar men qamauǵa alynǵan adamdardyń qūqyqtaryn qosa alǵanda Azamattyq jáne sayası qūqyqtar jóníndegí halyqaralyq paktíníń oryndalu barysy jóníndegí Qazaqstan Respublıkasynyń bayandamasyn qorǵauǵa daıyndyq máselelerín talqylady.
Kezdesu sońynda Adam qūqyqtary salasyndaǵy bírínshí kezektegí sharalar josparyn oryndau boıynsha 2021 jyldyń sońyna deıín «AÓDA» KKO-nyń qaǵıdalary men jūmys jospary qarastyryldy.
Kún tártíbíndegí árbír máselege qatysty píkírtalastar memlekettík organdar men úkímettík emes ūıymdardyń būdan árí ózara ís-qımyly boıynsha naqty ūsynystardyń ázírlenuín kózdep, ashyq árí syndarly sıpatqa ıe boldy.